Yevropadagi jazirama iqtisodiyotga 800 milliard yevrogacha zarar yetkazishi mumkin

Yevropada kuzatilayotgan kuchli issiqlik to‘lqini iqtisodiyot uchun jiddiy tahdidga aylanmoqda. EUobserver nashrining xabar berishicha, jazirama oqibatida Yevropa iqtisodiyotiga yetishi mumkin bo‘lgan umumiy zarar 800 milliard yevroga baholanmoqda.

 

Qayd etilishicha, haddan tashqari issiq ob-havo, ayniqsa ochiq havoda faoliyat yurituvchi qurilish, qishloq xo‘jaligi va boshqa tarmoqlarda mehnat unumdorligining pasayishiga sabab bo‘lib, ishchilarni himoya qilish tizimidagi kamchiliklarni ham yuzaga chiqarmoqda.

 

Yevropa atrof-muhit agentligi (EEA) mutaxassisi Xans Martin Fyusselning ta’kidlashicha, ekstremal issiqlik nafaqat sog‘liqni saqlash tizimi, balki Yevropa iqtisodiyoti va moliya sektori uchun ham jiddiy xavf tug‘diradi.

 

Allianz SE tahliliga ko‘ra, Fransiya 2030-yilgacha yozgi jaziramalar sabab eng katta iqtisodiy yo‘qotishlarga duch kelishi mumkin. Mamlakatda xavf ostidagi iqtisodiy mahsulot hajmi qariyb 240 milliard dollarni tashkil etadi. Shuningdek, Italiya, Ispaniya va Germaniya ham katta moliyaviy yo‘qotishlar ehtimoli yuqori bo‘lgan davlatlar qatoriga kiritilgan.

 

Yevropa iqtisodiy zonasi iqlim bo‘yicha mutaxassisi Arianna Jannetti esa kuchli issiqlik to‘lqinlari ko‘plab tarmoqlar uchun tizimli xavf tug‘dirayotganini ta’kidlagan.

 

Ma’lumotlarga ko‘ra, iyun oyining ikkinchi yarmida G‘arbiy Yevropaning qator hududlarida havo harorati 40 darajadan yuqori ko‘tarilgan. Copernicus Yer kuzatuv dasturi iyun oyini kuzatuvlar tarixidagi eng issiq oy sifatida qayd etdi. Shu bilan birga, Financial Times ma’lumotiga ko‘ra, Yevropa Ittifoqi davlatlari joriy yilning o‘zida o‘rmon yong‘inlarini bartaraf etishga 3 milliard yevrodan ortiq mablag‘ sarflagan.