2026-yil iyul oyi O‘zbekistonda rekord darajadagi eng issiq oylardan biri bo‘ldi
Havo harorati me’yordan 1,3–2,8°C yuqori bo‘lib, ayrim hududlarda harorat 50°C gacha ko‘tarilgan.
Òzgidromet ma'lumotiga ko‘ra, 2026-yil iyul oyida O‘zbekistonda havo harorati iqlimiy me’yorlardan sezilarli darajada yuqori bo‘ldi. Hududlarning katta qismida o‘rtacha oylik harorat me’yordan 1,3–2,3°C, shimoliy va cho‘l hududlarining ayrim joylarida esa 2,5–2,8°C yuqori qayd etildi.
Oyning dastlabki kunlari nisbatan salqin kechib, kunduzgi harorat 27–32°C atrofida bo‘lgan. Iyul oyining ikkinchi besh kunligidan boshlab havo harorati keskin ko‘tarilib, 18–19-iyul kunlari O‘zbekistonning katta qismida issiqlik eng yuqori darajaga yetgan.
Ushbu kunlarda havo harorati aksariyat hududlarda 43–45°C, janubiy va cho‘l hududlarida esa 46–50°C gacha ko‘tarilgan. Ayrim hududlarda maksimal harorat bo‘yicha yangi rekordlar qayd etilgan.
Toshkent shahrida eng yuqori harorat 19-iyul kuni kuzatilib, 44,3°C ni tashkil etgan. Bu poytaxtda 1997-yil 18-iyulda qayd etilgan mutlaq maksimal ko‘rsatkichdan atigi 0,3°C past.
Issiq kunlarda tunlari ham harorat yuqori bo‘lib, ayrim hududlarda minimal harorat 30–33°C gacha yetgan.
40°C va undan yuqori harorat kuzatilgan kunlar soni markaziy va sharqiy hududlarda 3–8 kunni, respublikaning boshqa hududlarida 9–18 kunni, janubning ayrim hududlari va Qizilqum cho‘lida esa 19–23 kunni tashkil etgan. Bu ko‘rsatkichlar uzoq yillik o‘rtacha qiymatlardan ancha yuqori.
Iyul oyida yog‘ingarchilik miqdori bo‘yicha ham ayrim hududlarda noodatiy holat kuzatilgan. Xorazm, Buxoro, Navoiy, Qashqadaryo va Surxondaryo viloyatlarida oy davomida asosan quruq ob-havo hukm surgan.
