30 yildan ortiq xizmat qilgan harbiylarning pensiyasi 100 foizgacha oshiriladi

 

Senatining navbatdagi majlisida “Harbiy xizmatchilar (xodimlar) va ularning oila a’zolari uchun davlat pensiya ta’minoti to‘g‘risida”gi qonun muhokama qilinib, senatorlar tomonidan ma’qullandi.

 

Mazkur qonun harbiy xizmatchilar, huquqni muhofaza qiluvchi organlar xodimlari hamda ularning oila a’zolarining davlat pensiya ta’minotiga oid munosabatlarni yagona huquqiy asosda tartibga solishga qaratilgan.

 

Muhokama davomida ushbu sohadagi munosabatlar uzoq yillar davomida asosan sobiq Sovet Ittifoqi davrida qabul qilingan hujjatlar va ayrim xalqaro shartnomalar asosida tartibga solib kelingani qayd etilgan. Yangi qonun esa pensiya ta’minoti masalalarini O‘zbekiston Konstitutsiyasi va milliy qonunchilik talablari asosida belgilaydi.

 

Qonun bilan birinchi marta davlat pensiyasini olish huquqiga ega bo‘lgan shaxslar doirasi, pensiya tayinlash shartlari hamda ularni hisoblash, qayta hisoblash va to‘lash tartibi aniq belgilanadi.

 

Xususan, xizmat yillari uchun pensiya, nogironlik pensiyasi hamda boquvchisini yo‘qotganlik pensiyasini tayinlash bo‘yicha yagona tartib joriy etiladi.

 

Qonunda uzoq yillar davomida xizmat qilgan harbiy xizmatchilarni ijtimoiy rag‘batlantirishga qaratilgan muhim o‘zgarishlar ham nazarda tutilgan. Jumladan, 30 yildan ortiq xizmat qilgan harbiy xizmatchilar uchun pensiyaning maksimal miqdori 75 foizdan 100 foizgacha oshiriladi.

 

Mazkur kafolatlar faqat kelgusida pensiyaga chiqadigan harbiy xizmatchilarga emas, balki ayni paytda pensiya olayotgan hamda kalendar hisobida 30 yildan ortiq xizmat qilgan harbiy xizmatchilar va xodimlarga ham tatbiq etiladi.

 

Qonunda harbiy xizmatchilarning oila a’zolarini ijtimoiy himoya qilish masalalariga ham alohida e’tibor qaratilgan. Jumladan, xizmat vaqtida halok bo‘lgan yoki xizmat davomida olgan jarohati yoxud kasalligi oqibatida vafot etgan harbiy xizmatchilarning oila a’zolariga boquvchisini yo‘qotganlik pensiyasini tayinlash bo‘yicha davlat kafolatlari mustahkamlanadi.

 

Senatorlarning ta’kidlashicha, mazkur qonun harbiy xizmatchilar va huquqni muhofaza qiluvchi organlar xodimlarining ijtimoiy himoyasini kuchaytirish, ularning ko‘p yillik xizmatini munosib baholash hamda oila a’zolarining huquq va manfaatlarini ishonchli himoya qilishga xizmat qiladi.

 

Muhokamalar yakunida qonun senatorlar tomonidan ma’qullandi.