AQSh Rossiya va Eronga qarshi sanksiyalarni kuchaytirilishi mumkin
Tegishli qonun loyihasi Senat tomonidan ma’qullandi.
AQSh Senati Rossiya va Eronga qarshi sanksiyalarni kuchaytirishga qaratilgan qonun loyihasini ma’qulladi. Hujjat Rossiya energetika resurslarini xarid qilayotgan mamlakatlarga nisbatan qo‘shimcha tariflar joriy etish imkonini beradi. Bu haqda Reuters xabar berdi.
Senatdagi ovoz berish jarayoni palataning rasmiy sayti orqali namoyish etildi. Endilikda qonun loyihasi AQSh Vakillar palatasida ko‘rib chiqilishi kutilmoqda.
Hujjatga ko‘ra, AQSh Rossiyadan neft, uran va tabiiy gaz sotib oluvchi mamlakatlardan import qilinadigan ayrim tovarlarga 100 foizgacha tarif joriy etishi mumkin. Shuningdek, AQSh prezidentiga Rossiya tovarlariga nisbatan 500 foizgacha boj belgilash vakolati berilishi nazarda tutilgan.
Qonun loyihasida Eronga qarshi amaldagi sanksiyalarni 2031-yilgacha uzaytirish ham ko‘zda tutilgan. Bundan tashqari, Eron bilan biznes yurituvchi AQShdan tashqaridagi kompaniyalarga nisbatan ikkilamchi sanksiyalar qo‘llash imkoniyati ham belgilanmoqda.
Senatdagi mazkur tashabbus Rossiyaning energetika eksportidan tushadigan daromadlarini cheklash hamda Eron bilan iqtisodiy aloqalarni qisqartirishga qaratilgan.
Shu bilan birga, qonun loyihasi hali yakuniy kuchga kirgan emas. U Vakillar palatasida ham ko‘rib chiqilishi va keyingi qonunchilik jarayonlaridan o‘tishi kerak.
