AQSH tarixida birinchi marta musulmon erkak senator bo‘lishi mumkin
41 yoshlik Abdul El-Sayed Michiganda Senat uchun praymerizda g‘alaba qozondi.
Associated Press axborot agentligi va boshqa yetakchi OAVlar saylov uchastkalari yopilganidan 12 soat oʻtib, chorshanba kuni El-Sayedning tor doiradagi shiddatli poygada gʻalaba qozonganini eʼlon qildi. Deyarli barcha ovozlar sanab chiqilgach, El-Sayed 1 foizlik ustunlik bilan g‘alabaga erishgan. U isroilparast guruhlar tomonidan amalga oshirilgan 60 million AQSH dollardan ortiq saylov kompaniyasi xarajatlariga qaramay g‘alaba qozongan. U AQSH Senati uchun Demokratik partiyadan nomzodlikni qo‘lga kiritgan.
Seshanba kuni boʻlib oʻtgan ovoz berish natijalari El-Sayedni magʻlub etish harakatlariga bosh-qosh boʻlgan hamda uning raqibi — AQSH Kongressi aʼzosi Heyli Stivensni 30 million dollardan ortiq mablagʻ bilan qoʻllab-quvvatlagan Amerika-Isroil jamoatchilik bilan aloqalar qoʻmitasiga (AIPAC) juda ogʻir zarba boʻldi.
Noyabr oyidagi saylovda El-Sayed sobiq respublikachi kongressmen Mayk Rojers bilan kuch sinashadi. Ushbu poyga noyabrdagi oraliq saylovlarning eng shiddatli kechadigan Senat oʻrinlaridan biri deb hisoblanmoqda va prezident Donald Trampning qolgan vakolat muddati davomida palatani qaysi partiya nazorat qilishini belgilab berishi mumkin.
Kelib chiqishi misrlik boʻlgan El-Sayed noyabrda gʻalaba qozonsa, AQSH tarixidagi birinchi musulmon senatorga aylanadi.
2024-yilda Trampga ovoz bergan «tebranuvchi» (swing state) Michigan shtatidagi seshanba kungi natija Demokratik partiyaning Yaqin Sharqdagi nizolarga nisbatan yuritadigan siyosatiga katta taʼsir koʻrsatadi.
El-Sayed Isroilning Gʻazodagi xatti-harakatlarini genotsid deb tan oladi va Isroil manfaatlariga xizmat qiladigan mojarolarga sarflanayotgan mablagʻlar AQSHdagi mahalliy jamoalarga — sogʻliqni saqlash, uy-joy va infratuzilma muammolarini hal qilishga yoʻnaltirilishi kerak deb hisoblaydi.
Nomzodlarni qoʻllab-quvvatlamaydigan mustaqil “Arab-Amerika institute” ijrochi direktori Maya Berri El-Sayedning gʻalabasini “juda muhim voqea” deb atadi.
Uning taʼkidlashicha, saylovchilar siyosat haqida gapirmasdan, faqat “Abdul ismli arab-amerikalik musulmon erkak” haqida salbiy hujumlarga toʻla reklamalar seliga «uchishmadi».
“Mamlakatning qolgan qismi Michigan bu kabi bosimlarga taslim boʻlmasligini bilib olganidan juda xursandman”, — degan Berri Al Jazeera’ga.
Tramp El-Sayedning gʻalabasi respublikachilar uchun «ajoyib xabar» ekanini aytdi.
“Yahudiylar va Isroilni yomon koʻradigan kommunist omadsiz El-Sayed Sotsialist bilan boʻlgan poygada taxminiy gʻolib boʻldi”, — deb yozdi AQSH prezidenti ijtimoiy tarmoqdagi sahifasida.
“Odatdagidek, soʻrovnomalar bu safar ham juda koʻp xato qildi. U (Stivens) bunchalik yaxshi natija koʻrsatishi kutilmagandi. Endi dem-ahmoqlarning (Dumocrats) tentakcha siyosati yanada yomonlashadi!”
