Eron AQSH bilan kelishuvga tayyor edi — Pezeshkian
Eron prezidenti AQSH bilan barbod bo‘lgan kelishuv tafsilotlarini ilk bor oshkor qildi.
Eron prezidenti Masud Pezeshkian Tehron urush va keskinlikni istamasligini, biroq Yaqin Sharqdagi AQSH harbiy bazalaridan hujum uyushtirilgan taqdirda mamlakat o‘zini himoya qilish huquqini saqlab qolishini ma’lum qildi.
Pezeshkianning ta’kidlashicha, Eron va AQSH o‘rtasidagi muzokaralarda muhim kelishuv loyihasi bo‘yicha asosiy masalalar amalda kelishib olingan. Hujjatga qo‘shimcha qonuniylik berish maqsadida uni AQSH prezidenti Donald Tramp shaxsan imzolashi kutilgan.
Biroq Eron prezidentining so‘zlariga ko‘ra, muzokaralar jarayoni 24 soatdan kam vaqt ichida keskin o‘zgargan va yakuniy kelishuvga erishilmagan. Pezeshkian kelishuv dastlab Eron rahbariyati tomonidan ma’qullanganini ta’kidlagan.
Eron prezidenti mamlakat mintaqada urush yoki boshqa davlatlarga hukmronlik qilishni maqsad qilmaganini qayd etgan. Uning fikricha, Islom Respublikasiga nisbatan tashqi bosim va tahdidlar to‘xtatilsa, mintaqadagi keskinlikni bartaraf etish uchun sharoit yaratiladi.
Shuningdek, Pezeshkian hukumat va harbiylar o‘rtasida kelishmovchiliklar mavjudligi, hukumat ichida bo‘linish yuzaga kelgani hamda uning iste’foga chiqishi mumkinligi haqidagi xabarlarni rad etgan.
U Eron o‘z huquqlarini qurolli qarama-qarshilikdan ko‘ra, muzokaralar orqali ta’minlashni afzal ko‘rishini bildirgan.
