O‘zbekistonda bolaga otasining ismini familiya sifatida berishga ruxsat beriladi
Senatorlar bu o‘zgarish milliy va diniy an’analarni hisobga olishga xizmat qilishini ta’kidladi.
O‘zbekistonda bolaga otasining ismini familiya sifatida berish imkoniyati qonunchilikda mustahkamlanmoqda.
Tegishli qonun bilan Oila kodeksining 69-moddasiga o‘zgartirishlar kiritilmoqda. Unga ko‘ra, ota-onalarga bolaning familiyasini belgilashda otasining ismidan familiya sifatida foydalanish imkoniyati beriladi.
Amaldagi tartibga ko‘ra, bolaning familiyasi ota-onaning familiyasiga qarab belgilanadi. Shu bilan birga, milliy an’analardan kelib chiqib, ayrim hollarda boboning ismini bolaning familiyasi sifatida berish amaliyoti ham mavjud.
Yangi tartib ushbu imkoniyatni qonunchilik darajasida aniq belgilashga qaratilgan.
Senatorlar bolaning otasining ismini familiya sifatida berish imkoniyatini qonunchilikda mustahkamlash fuqarolar uchun qo‘shimcha qulaylik yaratishini ta’kidladi. Shuningdek, mazkur o‘zgarish milliy va diniy an’analarni hisobga olgan holda fuqarolarning xohish-istaklarini amalga oshirishga xizmat qilishi qayd etildi.
Qonun bilan “Arxiv ishi to‘g‘risida”gi qonunchilikka ham qator o‘zgartirishlar kiritilmoqda. Jumladan, arxiv ishi sohasidagi vakolatli davlat organlarining vakolatlari aniqlashtiriladi, nodavlat va elektron arxivlarni tashkil etish tartiblari, shuningdek, arxiv hujjatlarining idoraviy arxivlarda vaqtincha saqlanish muddatlari belgilanadi.
Faol muhokamalardan so‘ng qonun senatorlar tomonidan ma’qullandi.
