O‘zbekistonda botanika bog‘lariga tashriflar soni 3,8 barobarga oshdi
2026-yil 1-yanvar holatiga O‘zbekistonda 3 ta botanika bog‘i faoliyat yuritmoqda.
O‘zbekistonda botanika bog‘lariga tashrif buyuruvchilar soni sezilarli darajada oshgan. 2025-yil davomida mamlakatdagi botanika bog‘lariga jami 1 million 170 ming kishi tashrif buyurgan.
Milliy statistika qo‘mitasi ma’lumotlariga ko‘ra, mazkur ko‘rsatkich 2024-yilga nisbatan 3,8 barobarga ko‘p. Bu esa aholining botanika bog‘lari va ulardagi tabiiy o‘simliklar kolleksiyalariga qiziqishi ortib borayotganini ko‘rsatadi.
2026-yil 1-yanvar holatiga ko‘ra, O‘zbekistonda jami 3 ta botanika bog‘i faoliyat yuritmoqda. Ular Qoraqalpog‘iston Respublikasi, Buxoro viloyati va Toshkent shahrida joylashgan.
Statistik ma’lumotlarda qayd etilishicha, 2025-yil davomida botanika bog‘larining umumiy maydoni ham kengaygan. Bir yil ichida ularning maydoni 6 gektarga oshib, 113,3 gektarga yetgan.
