O‘zbekistonlik bokschi AQSHda hibsga olinib, deportatsiya qilindi
Bokschining so‘zlariga ko‘ra, u qamoqxonada 45 kun saqlangan.
O‘zbekistonlik professional bokschi Qudratillo Abduqahhorov AQSHda immigratsiya bilan bog‘liq holat sabab hibsga olinib, keyinchalik mamlakatdan deportatsiya qilingan.
Ma’lum qilinishicha, 2026-yil 21-mart kuni Joshua Kevin Antonga qarshi jangdan so‘ng Abduqahhorov Los-Anjelesdan Pensilvaniyaga yo‘l olgan. Bokschining aytishicha, u ushbu hududda yashab, ishlagan.
Oradan bir necha kun o‘tib, Abduqahhorov politsiya tomonidan to‘xtatilgan va AQSH Immigratsiya va Bojxona nazorati xizmati (ICE) ixtiyoriga olingan. Keyinchalik u Vayoming shtatidagi Suituoter okrugi qamoqxonasiga o‘tkazilgan.
Bokschining so‘zlariga ko‘ra, u mazkur qamoqxonada 45 kun saqlangan. Shuningdek, 25 ming dollar garov puli to‘lagani, advokati bilan esa qamoqqa olinganidan taxminan bir oy o‘tib uchrasha olganini bildirgan.
Abduqahhorovning menejeri bokschining AQSHdagi ish vizasi muddati tugaganini ma’lum qilgan. Unga O‘zbekistonga qaytish tavsiya etilgan bo‘lsa-da, sportchi AQSHda qolib, DoorDash kuryeri sifatida ishlashni davom ettirgan.
Keyinchalik Abduqahhorov Filadelfiyada yana qo‘lga olingan va AQSHdan deportatsiya qilingan.
