Qurilish sohasi Yangi O‘zbekiston qiyofasini belgilamoqda — Shavkat Mirziyoyev
Prezident quruvchilar, me’morlar, muhandislar va soha faxriylarini Qurilish sohasi xodimlari kuni bilan muborakbod etdi.
Prezident Shavkat Mirziyoyev quruvchilar, me’morlar, muhandislar, loyihachilar, mashinist va mexaniklar hamda soha faxriylarini Qurilish sohasi xodimlari kuni bilan tabrikladi.
Prezident o‘z tabrigida qurilish sohasi mamlakatning zamonaviy qiyofasini shakllantirish, hududlarni obod qilish va aholi uchun qulay yashash sharoitlarini yaratishda muhim o‘rin tutayotganini ta’kidladi.
Qayd etilishicha, so‘nggi 9 yilda O‘zbekistonda 210 million kvadrat metrdan ziyod bino va inshootlar, jumladan, 647 mingta kvartiraga ega uy-joylar barpo etilgan. Joriy yilda yana 140 mingta yangi kvartirani foydalanishga topshirish rejalashtirilgan.
Shuningdek, 2040-yilgacha mamlakatda yiliga quriladigan uy-joylar sonini 280 mingtagacha yetkazish va “Yangi O‘zbekiston” massivlari sonini 120 taga ko‘paytirish ko‘zda tutilgani qayd etildi.
Tabrikda Islom sivilizatsiyasi markazi, Imom Buxoriy yodgorlik majmuasi, Burhoniddin Marg‘inoniy turizm markazi hamda Yangi Toshkent, Nurafshon, Bobur, Shirin va Al Xorazmiy kabi yirik loyihalarda quruvchilarning hissasi alohida e’tirof etildi.
Prezident sohada ruxsat berish jarayonlari va muddatlari qisqartirilgani, “Shaffof qurilish” milliy axborot tizimi doirasida zamonaviy elektron platformalar ishga tushirilgani hamda nazorat jarayonlari raqamlashtirilganini ta’kidladi.
Shuningdek, qurilishda sun’iy intellekt texnologiyalarini keng joriy etish, inson omilini kamaytirish va korrupsiyaviy xavflarning oldini olish borasidagi ishlar davom ettirilishi qayd etildi.
Davlat rahbari soha xodimlarining bilim va tajribasi, kasb mahoratini oshirish hamda ularning mehnatini har tomonlama rag‘batlantirish bundan buyon ham e’tibor markazida bo‘lishini bildirdi.
Prezident barcha qurilish sohasi xodimlariga mustahkam sog‘liq, oilaviy baxt-saodat, ishlarida yangi yutuq va omadlar tiladi.
