Rossiya yaqin haftalarda NATO davlatlaridan biriga zarba berishi mumkin
Razvedka hisobotida Rossiyaning bunday harakati kuz oylaridan 2029-yilgacha bo‘lgan davrda yuz berishi mumkinligi qayd etilgan.
The Telegraph xabariga ko‘ra, AQSH razvedka idoralari Rossiya prezidenti Vladimir Putin yaqin haftalarda yoki kuz oylaridan boshlab NATOga a'zo davlatlardan biriga nisbatan cheklangan harbiy yoki gibrid xarakterdagi provokatsiya uyushtirishi mumkinligini istisno qilmayapti. Razvedka hisobotida bunday harakatning asosiy maqsadi alyansning birdamligi va Shimoliy Atlantika shartnomasining 5-moddasi amalda qanday ishlashini sinovdan o‘tkazish bo‘lishi mumkinligi aytiladi.
Hisobotda ehtimoliy ssenariylar qatorida NATO hududiga kichik ko‘lamli quruqlikdan kirib borish, muhim infratuzilmaga qarshi kiberhujumlar, noma'lum qurolli guruhlar orqali amalga oshiriladigan gibrid operatsiyalar hamda Rossiya bilan bog‘liqligi rasman inkor etilishi mumkin bo‘lgan boshqa provokatsiyalar tilga olingan. AQSH razvedkasi bunday harakatlar to‘liq urush boshlashdan ko‘ra, NATOning siyosiy va harbiy birlik darajasini tekshirishga qaratilishi mumkinligini baholagan.
Nashrning yozishicha, razvedka baholashi Rossiyaning so‘nggi oylarda NATO sharqiy qanoti yaqinidagi faolligi ortgani fonida tayyorlangan. Litva maxsus xizmatlari Moskva qo‘lga kiritilgan Ukraina dronlaridan foydalanib Boltiqbo‘yi davlatlarida "soxta bayroq" operatsiyalarini uyushtirishi mumkinligi haqida ogohlantirgan. Polsha va boshqa NATO davlatlari ham Rossiya tomonidan ehtimoliy sabotaj va gibrid tahdidlar yuzasidan xavotir bildirgan.
Shu bilan birga, The Wall Street Journal ma’lumotlariga ko‘ra, AQSH razvedkasi bunday ssenariy kuz oylaridan 2029-yilgacha bo‘lgan davrda yuz berishi mumkinligini baholamoqda. Hisobotda aniq davlat yoki hujum sanasi ko‘rsatilmagan. Razvedka idoralari buni Rossiyaning ko‘rib chiqayotgan ehtimoliy variantlaridan biri sifatida baholagan.
