Toshkentda havo transportida xavfsizlikni ta’minlash bo‘yicha o‘quv mashg‘uloti o‘tkazildi

Toshkent xalqaro aeroporti tashabbusi bilan aviatsiya qidiruv-qutqaruv xizmatlarining favqulodda vaziyatlarga tayyorgarligini sinovdan o‘tkazishga qaratilgan keng ko‘lamli o‘quv mashg‘uloti tashkil etildi. Bu haqda “Zamon” informatsion-tahliliy dasturida xabar berildi.

 

Ma’lum qilinishicha, mashg‘ulot Mudofaa vazirligiga qarashli Desantlarni qayta tayyorlash markazida o‘tkazildi. Ssenariyga ko‘ra, hududda havo kemasi halokatga uchragani haqida shartli signal berildi.

 

Signal kelib tushgach, Toshkent xalqaro aeroportining qidiruv-qutqaruv guruhi belgilangan hududga 10 daqiqa ichida yig‘ildi. Shuningdek, voqea joyiga  Toshkent viloyati Favqulodda vaziyatlar bosh boshqarmasi, yong‘in o‘chirish texnikalari, Ichki ishlar bosh boshqarmasi tezkor qidiruv guruhi, tez tibbiy yordam xodimlari jo‘natildi.

 

O‘quv mashg‘uloti davomida shartli halokat hududida qidiruv-qutqaruv ishlari olib borildi, jabrlanganlar xavfsiz hududga evakuatsiya qilindi va ularga birinchi tibbiy yordam ko‘rsatildi. Shuningdek, shartli yong‘inni bartaraf etish, voqea joyini xavfsizlik nazoratiga olish hamda turli xizmatlarning o‘zaro hamkorligi amaliy tarzda sinovdan o‘tkazildi.

 

Tashkilotchilarning ta’kidlashicha, mashg‘ulotda oltita bo‘linma reja-jadval asosida harakatga keltirilgan. Shartli jabrlanganlar qutqarilib, ularga tibbiy yordam ko‘rsatilgan va shifoxonaga yetkazilgan.

 

Mutaxassislar bunday kompleks mashg‘ulotlar favqulodda vaziyatlarda tezkor qaror qabul qilish, qidiruv-qutqaruv ishlarini samarali tashkil etish hamda turli idoralar o‘rtasidagi hamkorlikni kuchaytirishga xizmat qilishini qayd etmoqda.

 

Qidiruv-qutqaruv xizmatlarining amaliy tayyorgarligini oshirish va yuz berishi mumkin bo‘lgan favqulodda vaziyatlarda harakatlarning doimiy shayligini ta’minlash maqsadida bunday mashg‘ulotlarni muntazam o‘tkazish rejalashtirilgan.