Toshkentda “zakladka” usulida narkotik tarqatgan shaxslar ushlandi
Tezkor tadbirlar davomida 3 kilogrammdan ortiq narkotik moddalar aniqlangan.
“Tinch va sog‘lom yurt” tezkor-profilaktik tadbirlari doirasida Davlat xavfsizlik xizmati va bojxona organlari xodimlari tomonidan Toshkent shahrining Sergeli tumanida narkotik moddalar noqonuniy aylanishiga qarshi tezkor tadbir o‘tkazildi.
Tadbir davomida 1993-yilda tug‘ilgan fuqaroning avtomobili va yashash xonadoni xolislar ishtirokida ko‘zdan kechirilganda 1,1 kilogramm “Alfa-PVP”, 1,9 kilogramm marixuana, 65 gramm geroin va 16 gramm “5F-APINACA” moddasi, shuningdek, narkotiklarni qadoqlashda foydalanilgan zip-paketlar va elektron tarozi ashyoviy dalil sifatida olingan.
Tezkor tadbirning keyingi bosqichida mazkur shaxsga narkotik moddalarni “zakladka” usulida tarqatish bo‘yicha topshiriq bergan, 1988-yilda tug‘ilgan, ilgari giyohvandlik vositalari bilan bog‘liq jinoyat uchun sudlangan ayol ham ushlangan.
Holat yuzasidan Jinoyat kodeksining 273-moddasi 6-qismi “a” bandi bilan jinoyat ishi qo‘zg‘atilib, gumonlanuvchilarga nisbatan “qamoq” ehtiyot chorasi qo‘llanilgan.
Hozirda tergov harakatlari davom ettirilmoqda.
