2025-yilda korrupsion jinoyatlar eng ko‘p Andijonda aniqlangan — senator
Oʻtgan yilda Oʻzbekistonda korrupsiyaga oid jinoyatlar bo‘yicha 7 517 kishi javobgarlikka tortilgan.
O‘zbekistonda 2025-yil davomida korrupsiyaga oid jinoyatlar sodir etgan 7 517 kishi jinoiy javobgarlikka tortilgan. Bu haqda 8-avgust kuni bo‘lib o‘tgan Senat majlisida senator Abduhakim Eshmurodov ma’lum qildi.
Senatorning ta’kidlashicha, o‘tgan yil davomida korrupsion jinoyatlar oqibatida davlat manfaatlariga 2,9 trillion so‘mdan ortiq zarar yetkazilgan.
Korrupsiyaga oid jinoyat sodir etgan shaxslar soni bo‘yicha hududlar kesimida Andijon viloyati yetakchi bo‘lgan. Bu hududda 946 nafar shaxs aniqlangan. Keyingi o‘rinlarda Toshkent viloyati — 793 nafar, Qashqadaryo — 745 nafar, Samarqand — 709 nafar va Namangan viloyati — 509 nafar bilan qayd etilgan.
Sohalar kesimida korrupsion jinoyatlar bo‘yicha jinoiy javobgarlikka tortilganlarning asosiy qismi maktabgacha va maktab ta’limi tizimi xodimlari hissasiga to‘g‘ri kelgan — 580 nafar.
Shuningdek, mahalliy hokimliklarning 497 nafar, sog‘liqni saqlash tashkilotlarining 404 nafar, tijorat banklarining 245 nafar hamda oliy ta’lim muassasalarining 161 nafar xodimi jinoiy javobgarlikka tortilgan.
Abduhakim Eshmurodov korrupsiyaga oid jinoyatlar sonining ko‘payishini, avvalo, bunday huquqbuzarliklarni aniqlash va fosh etish bo‘yicha ishlar faollashgani bilan izohlagan.
Shu bilan birga, senator vazirlik va idoralardagi ichki nazorat tuzilmalari faoliyatida samaradorlik yetarli emasligini qayd etgan.
Uning ta’kidlashicha, ayrim tashkilotlarda korrupsiyaning oldini olish uchun tashkil etilgan komplayens-nazorat tuzilmalari amaliy profilaktika choralarini amalga oshirish o‘rniga, asosan hisobot taqdim etish bilan cheklanib qolmoqda.
