Chilonzorda MIB orqali 18 mlrd soliq qarzdorligi undirildi
Shu tariqa ijro hujjatlarining ijrosi amalda to‘liq taʼminlangan.
Majburiy ijro byurosining Chilonzor tuman bo‘limi ish yurituviga Yirik soliq to‘lovchilari bo‘yicha Hududlararo soliq inspeksiyasi boshlig‘ining qarorlariga asosan qarzdor aksiyadorlik jamiyatidan davlat foydasiga jami 18 560 634 386 so‘m miqdoridagi soliq qarzini undirish to‘g‘risidagi ijro hujjatlari kelib tushgan.
Mazkur ijro hujjatlari asosida davlat ijrochilari tomonidan O‘zbekiston Respublikasining «Sud hujjatlari va boshqa organlar hujjatlarini ijro etish to‘g‘risida»gi Qonunining 23-moddasi talablariga muvofiq ijro ishi qo‘zg‘atilib, qarzdorga ixtiyoriy muddatda ijro etish haqida ogohlantirish berilgan.
Davlat ijrochilari tomonidan qarzdorga nisbatan qonunchilikda nazarda tutilgan majburiy ijro choralari qo‘llanilishi natijasida davlat foydasiga 18 560 634 386 so‘m miqdoridagi soliq qarzi to‘liq undirilib, ijro hujjatlarining ijrosi amalda taʼminlandi.
