Eron iqtisodiyoti juda yomon ahvolda — Tramp
AQSh prezidenti Tehron bilan qisman muzokaralar olib borilayotganini va kelishuvga erishilishi mumkinligini ta’kidladi.
AQSh prezidenti Donald Tramp Eron iqtisodiy vaziyati yomonlashib borayotganini va Vashington hamda Tehron o‘rtasida kelishuvga erishilishi mumkinligini bildirdi. Bu haqda u Axios nashriga bergan intervyusida ma’lum qildi.
Trampning ta’kidlashicha, AQSh Eron masalasida “jimgina” harakat qilmoqda va tomonlar o‘rtasida qisman muzokaralar olib borilmoqda.
Amerika prezidenti Eron iqtisodiyotida yuqori inflyatsiya va moliyaviy muammolar mavjudligini qayd etgan. Uning fikricha, Tehron hozirda iqtisodiy jihatdan “juda yomon ahvolda”.
Tramp Eron iqtisodiy vaziyatining yomonlashuvini, jumladan, AQSh tomonidan amalga oshirilayotgan dengiz blokadasi bilan bog‘lagan.
Axios xabariga ko‘ra, AQSh rasmiylari Tramp bundan bir hafta avval Eronga qarshi keng ko‘lamli harbiy harakatlarni qayta boshlashga moyil bo‘lganini, biroq keyinchalik vaziyatni hozircha yumshatish qaroriga kelganini bildirgan.
Shu bilan birga, Tramp Tehron bilan kelishuvga erishish istiqboli borligini ta’kidlagan. Uning so‘zlariga ko‘ra, jarayon shaxmat o‘yiniga o‘xshaydi va yakunda “hammasi yaxshi bo‘ladi”.
