Eron “Makka” paktidan xavotirda emasligini bildirdi
Tehron yangi xavfsizlik kelishuvi Eron manfaatlariga qarshi qaratilganiga asos ko‘rmayotganini ma’lum qildi.
Eron Tashqi ishlar vazirligi vakili Ismoil Bag‘oiy Pokiston, Turkiya va Saudiya Arabistoni o‘rtasida tuzilgan yangi xavfsizlik kelishuvi Tehronga qarshi qaratilganidan xavotirlanish uchun sabab yo‘qligini aytdi. Bu haqda Reuters xabar berdi.
Bag‘oiyga ko‘ra, mazkur kelishuv mintaqa davlatlarining xavfsizlik masalalarida tashqi kuchlarga tayanish o‘rniga o‘z imkoniyatlariga ko‘proq suyanishga o‘tayotganini ko‘rsatadi. U bunday mintaqaviy hamkorlikni ijobiy baholash mumkinligini bildirdi.
Eron vakili kelishuv mintaqaning geosiyosiy va tarixiy voqeligini hisobga olishi, keng qamrovli va barcha tomonlar uchun ochiq bo‘lishi kerakligini ta’kidladi. Uning fikricha, xavfsizlikka tahdidlarning asl manbalari to‘g‘ri aniqlansa, bunday tashabbuslar mintaqada xavfsizlikni mustahkamlash va beqarorlikning oldini olishga xizmat qilishi mumkin.
Bag‘oiy bayonotida Isroil va uning ittifoqchilarini ham tilga olib, mintaqadagi xavfsizlik masalalarida aynan real tahdidlarni to‘g‘ri baholash muhimligini qayd etdi.
Eslatib o‘tamiz, Pokiston, Turkiya va Saudiya Arabistoni 7-avgust kuni Makkada qo‘shma mudofaa kelishuvini imzolagan edi.
