Farg‘onada noqonuniy qurilgan savdo do‘konlari buzdirilmoqda
Maʼlum bo‘lishicha, qarzdor qonuniy talablarni bajarish o‘rniga turli idoralarga murojaat qilib, ijro jarayonini cho‘zishga uringan.
Furqat tumani markaziy yo‘li yoqasida, uch davlat o‘rtasida barpo etilayotgan “DO‘STLIK” bozori va ko‘ngilochar majmuasi oldida noqonuniy qurilgan savdo do‘koni sud qarori asosida majburiy tarzda buzdirildi.
Fuqarolik ishlari bo‘yicha O‘zbekiston tumanlararo sudining 2026 yil 6 iyundagi qaroriga muvofiq, mazkur noqonuniy qurilmani qarzdor z. Ro‘ziyeva o‘z hisobidan bartaraf etishi lozim edi. Shu asosda Majburiy ijro byurosi tomonidan ijro ishi qo‘zg‘atilib, davlat ijrochisi qarzdorni bir necha bor ixtiyoriy ravishda sud qarorini bajarish haqida ogohlantirgan.
Biroq qarzdor qonuniy talablarni bajarish o‘rniga turli idoralarga murojaat qilib, ijro jarayonini cho‘zishga uringan. Lekin sud qarori bajarilishi shart.
Furqat tuman prokuraturasi bilan hamkorlikda o‘tkazilgan majburiy ijro harakatlari davomida maxsus texnikalar jalb qilinib, noqonuniy qurilgan savdo do‘koni to‘liq buzdirildi va sud qarori ijrosi taʼminlandi.
