Janubiy Koreya Ukrainaga halokatli qurol yetkazib bermaydi — Yonhap
Avvalroq Ukraina prezidenti Vladimir Zelenskiy Seulni Kiyevga havo mudofaasi tizimlarini yetkazib berishga chaqirgandi.
Janubiy Koreya Ukrainaga halokatli qurol-yarog‘ yetkazib bermaslik siyosatiga sodiq qolmoqda. Bu haqda Yonhap axborot agentligi mamlakat Tashqi ishlar vazirligining yuqori lavozimli vakiliga tayanib xabar berdi.
Ma’lum qilinishicha, Janubiy Koreya harbiy texnika va boshqa ta’minotlarni faqat amaldagi ichki qonunchilik talablariga muvofiq yetkazib beradi. Mamlakat qonunchiligi esa qurolli mojarolar davom etayotgan davlatlarga halokatli qurol yetkazib berishni cheklaydi.
Avvalroq Ukraina prezidenti Vladimir Zelenskiy Seulni Kiyevga havo mudofaasi tizimlarini yetkazib berishga chaqirgandi. Biroq Janubiy Koreya hukumati bu masalada ehtiyotkor pozitsiyani saqlab qolmoqda.
Tashqi ishlar vazirligi vakilining ta’kidlashicha, Seul Ukrainaga energetika, infratuzilma, sog‘liqni saqlash va ta’lim kabi yo‘nalishlarda yordam ko‘rsatishda davom etmoqda. Shuningdek, Ukrainada tinchlikni tiklash va urushdan keyingi qayta qurish bilan bog‘liq takliflar ham ko‘rib chiqilishi mumkin.
Janubiy Koreya shu paytgacha Ukrainaga gumanitar va moliyaviy yordam, shuningdek, halokatli bo‘lmagan harbiy texnikalarni yetkazib bergan. Biroq mamlakat Kiyevga qurol-yarog‘ yetkazib berishdan tiyilib kelmoqda.
