JCh vaqtida Messi va Ronalduga suiqasd uyushtirish rejalashtirilgan
Messi bilan bog‘liq bir nechta suiqasd tahdidlari, Ronalduga nisbatan esa shubhali shaxslarning harakatlari qayd etilgan.
2026-yilgi Jahon chempionati davomida futbol yulduzlari Lionel Messi va Krishtianu Ronalduga qarshi turli tahdidlar qayd etilgani ma’lum qilindi. Bu haqda Marca nashri xabar berdi.
Ma’lumotlarga ko‘ra, turnir davomida AQSh Federal qidiruv byurosi (FQB) hamda Xalqaro politsiya hamkorlik markazi (IPCC) futbolchilar va boshqa turnir ishtirokchilariga nisbatan xavfsizlik tahdidlarini tekshirgan.
Lionel Messi eng ko‘p tahdidlarga duch kelgan futbolchilardan biri bo‘lgan. Argentina terma jamoasining Iordaniya va Misrga qarshi uchrashuvlari oldidan stadionlarga hujum qilish va futbolchini o‘ldirish bilan bog‘liq tahdidlar kelib tushgan.
Xususan, Argentina–Iordaniya uchrashuvi oldidan Dallas aeroportiga noma’lum shaxs qo‘ng‘iroq qilib, stadionga qurol va portlovchi moddalar bilan bostirib kirish hamda Messiga hujum qilish bilan tahdid qilgan. Argentina–Misr o‘yini oldidan esa ijtimoiy tarmoqlarda Messiga qarshi zo‘ravonlik tahdidlari tarqalgan.
Shuningdek, stadionlardan birida portlovchi qurilmalar joylashtirilgani haqidagi xabar ham kelib tushgan. Huquq-tartibot idoralari maxsus xizmat itlari yordamida stadionni tekshirgan, biroq xabar yolg‘on ekani aniqlangan.
Krishtianu Ronaldu bilan bog‘liq xavfsizlik holatlari ham qayd etilgan. FIFA portugaliyalik futbolchining qayerda yashayotgani haqida ma’lumot olishga uringan shubhali shaxs haqida huquq-tartibot idoralarini xabardor qilgan. Keyinchalik u Portugaliya terma jamoasi joylashgan mehmonxonada qo‘lga olingan.
Torontoda ham Ronalduning liftiga kirishga uringan shaxs ushlangan. U futbolchi bilan selfi tushmoqchi bo‘lganini bildirgan.
Jahon chempionati davomida hakamlar ham tahdidlarga duch kelgan. Argentina–Misr uchrashuvidan keyin fransiyalik hakam Fransua Leteksye shaxsiy WhatsApp akkauntiga 6 mingdan ortiq haqorat va tahdid mazmunidagi xabarlar olgan. VAR hakami Villi Delajod ham shunga o‘xshash tahdidlarga duch kelgani aytilmoqda.
Mazkur holatlardan so‘ng Fransiyada hakamlar va ularning oila a’zolari xavfsizligini ta’minlash choralari kuchaytirilgan.
