Raqobat qo‘mitasi biologik faol qo‘shimchalar reklamasi bo‘yicha ogohlantirdi
Qo‘mita BАD mahsulotlarini turli kasalliklarni davolovchi vosita sifatida targ‘ib qilish qonunchilik talablariga zid ekanini eslatdi.
O‘zbekistonda biologik faol qo‘shimchalar, malhamlar, surtma va balzamlar, damlamalar hamda mineral suvlarning turli kasalliklarni davolashi haqidagi reklamalar tarqalishi yuzasidan Raqobat qo‘mitasi ogohlantirish berdi.
Qo‘mita ma’lumotiga ko‘ra, ayrim reklamalarda biologik faol qo‘shimchalar diabet, insult, gastrit, yurak-qon tomir, jigar, buyrak, artrit va gipertoniya kabi kasalliklarni davolashda samarali vosita sifatida ko‘rsatilmoqda. Bunday targ‘ibot iste’molchilarda mahsulotni dori vositasi sifatida qabul qilishga sabab bo‘lishi mumkin.
Qo‘mita qayd etishicha, vakolatli organlar xulosasiga ko‘ra, biologik faol qo‘shimchalarning asosiy vazifasi organizmning foydali moddalarga bo‘lgan kundalik ehtiyojini qondirishdan iborat. Ular dori vositasi hisoblanmaydi va kasalliklarni davolash uchun mo‘ljallanmagan.
“Reklama to‘g‘risida”gi qonunning 35-moddasida biologik faol va oziq-ovqat qo‘shimchalari reklamasiga qo‘yiladigan talablar belgilangan. Unga ko‘ra, bunday mahsulotlar dori vositasi yoki davolash xususiyatiga ega degan taassurot uyg‘otadigan tarzda reklama qilinmasligi kerak.
Shuningdek, reklamalarda odamlarning mahsulotdan foydalanib davolangani yoki ahvoli yaxshilangani haqidagi holatlarga havola qilish, fuqarolarning minnatdorchiliklari yoki tavsiyalaridan foydalanish ham mumkin emas. Mahsulotning tadqiqotlardan o‘tgani yoki davlat ro‘yxatidan o‘tkazilgani haqida ma’lumot berish orqali uning dori vositalaridan ustunligi haqida tasavvur uyg‘otishga ham yo‘l qo‘yilmaydi.
Bundan tashqari, biologik faol qo‘shimchalar reklamasi «Ushbu mahsulot dori vositasi emas» mazmunidagi ogohlantirish bilan berilishi shart.
Qonunchilik talablarini buzganlik uchun moliyaviy sanksiyalar qo‘llanishi mumkin.
