Shimoliy Koreya Rossiyaga 500 ming askar yuborishi mumkin
Zelenskiy Pxenyan Rossiyaga qo‘shinlar bilan birga raketa qurollarini ham yetkazib berayotganini bildirdi.
Ukraina prezidenti Vladimir Zelenskiy Rossiya hududiga 50 minggacha Shimoliy Koreya askari joylashtirilishi mumkinligini bildirdi. U ushbu ma'lumotni 9-avgust kuni ijtimoiy tarmoqdagi bayonotida keltirgan. Bu haqda Reuters xabar berdi.
Zelenskiyning aytishicha, Shimoliy Koreya Rossiyaga nafaqat harbiy xizmatchilar, balki qurol-yarog‘ ham yetkazib bermoqda. Ukraina rahbari mamlakat hududidan Shimoliy Koreyada ishlab chiqarilgan raketalar topilganini ham ma'lum qilgan.
Uning ta’kidlashicha, Pxenyan Rossiya bilan hamkorlik orqali zamonaviy urush olib borish bo‘yicha tajriba orttirmoqda va harbiy texnologiyalarni o‘zlashtirmoqda. Zelenskiy buni Osiyodagi boshqa davlatlar uchun ham xavf tug‘dirishi mumkin bo‘lgan jarayon sifatida baholagan.
Ukraina prezidenti Janubiy Koreyani Kiyevga havo mudofaasi tizimlarini kuchaytirishda yordam berishga chaqirgan. Shuningdek, ikki davlat o‘rtasida dron texnologiyalari va mudofaa sohasidagi boshqa yo‘nalishlarda hamkorlikni rivojlantirishni taklif qilgan.
Ma’lumotlarga ko‘ra, Shimoliy Koreya 2024-yilda Rossiyaning Kursk viloyatiga qariyb 14 ming askar yuborgan. Keyinchalik Pxenyan Rossiya kuchlariga yordam berish uchun qo‘shimcha harbiy xizmatchilar va boshqa mutaxassislarni ham jo‘natgan.
Zelenskiy iyul oyida Rossiya yana 30 ming nafar Shimoliy Koreya askarini qabul qilishga tayyorlanayotganini aytgan edi. 9-avgustdagi yangi bayonotida esa u ehtimoliy kontingent sonini 50 ming nafargacha oshirgan.
