Turkiya, Pokiston va Saudiya Arabistoni qo‘shma harbiy mashg‘ulotlar o‘tkazadi
Mazkur rejalar uch davlat o‘rtasida 7-avgust kuni imzolangan Makka kelishuvi doirasida amalga oshiriladi.
Turkiya, Pokiston va Saudiya Arabistoni mudofaa sohasidagi hamkorlikni kengaytirish, harbiy tajriba almashish va qo‘shma mashg‘ulotlar o‘tkazishni rejalashtirmoqda.
Turkiye gazetesi nashri xabariga ko‘ra, mazkur rejalar uch davlat o‘rtasida 7-avgust kuni imzolangan Makka kelishuvi doirasida amalga oshiriladi. Kelishuv Turkiya parlamenti tomonidan kuzgi sessiyada ratifikatsiya qilinganidan so‘ng kuchga kirishi kutilmoqda.
Kelishuv doirasidagi harbiy hamkorlikning dastlabki bosqichida uch davlat o‘rtasida harbiy xizmatchilar almashinuvi yo‘lga qo‘yilishi rejalashtirilgan. Bu uzoq muddatli harbiy hamkorlik uchun asos yaratishi ko‘zda tutilmoqda.
Shuningdek, Turkiya, Pokiston va Saudiya Arabistoni qurolli kuchlarining ehtimoliy inqirozli vaziyatlarda o‘zaro hamkorligini kuchaytirish maqsadida qo‘shma harbiy mashg‘ulotlar o‘tkazadi.
Kelishuv doirasida ehtimoliy xavflarni oldindan aniqlashga xizmat qiluvchi erta ogohlantirish mexanizmini yaratish ham nazarda tutilgan. Turkiya tomoni ushbu mexanizm kelishuvning oldini olish va mudofaa salohiyatini kuchaytirishini ta’kidlagan.
Makka kelishuvi 7-avgust kuni Saudiya Arabistoni valiahd shahzodasi Muhammad bin Salmon, Turkiya prezidenti Rajab Toyyib Erdo‘g‘an va Pokiston bosh vaziri Shahboz Sharif tomonidan imzolangan.
Kelishuvning asosiy qoidalaridan biriga ko‘ra, uch davlatdan biriga qilingan qurolli hujum barcha tomonlarga qarshi tajovuz sifatida baholanadi.
