UEFA Infantinoga qarshi tergov boshlashi mumkin
Tekshiruv Infantino UEFA bosh kotibi bo‘lib ishlagan davrda sobiq xodimaga to‘langan olti xonali kompensatsiya bilan bog‘liq bo‘lishi mumkin.
Yevropa futbol assotsiatsiyalari ittifoqi (UEFA) FIFA prezidenti Janni Infantinoning tashkilotdagi faoliyati yuzasidan tergov boshlashi mumkin. Bu haqda The Telegraph xabar berdi.
Nashr ma’lumotlariga ko‘ra, ehtimoliy tekshiruv Infantino UEFA bosh kotibi lavozimida ishlagan davrda u bilan shaxsiy munosabatda bo‘lgan sobiq xodimga to‘langan olti xonali kompensatsiya bilan bog‘liq bo‘lishi mumkin.
Xabarlarga ko‘ra, ushbu xodim dastlab ma’muriy lavozimda faoliyat yuritgan, keyinchalik esa yuqori lavozimga ko‘tarilib, uning maoshi 30 foizga oshirilgan. Shuningdek, UEFA xodim tashkilotni tark etganidan so‘ng uning biznes maktabidagi MBA ta’limi uchun ham mablag‘ ajratgani aytilmoqda.
Mazkur holatlar tashkilot xodimlari orasida manfaatlar to‘qnashuvi yuzasidan savollar tug‘dirgani bildirilgan. O‘sha vaqtdagi UEFA prezidenti Mishel Platini bu masalani Infantino bilan muhokama qilgani va keyinchalik xodimga kompensatsiya to‘lab, tashkilotni tark etish bo‘yicha kelishuvga erishilgani aytilmoqda.
UEFA xodimga ishdan bo‘shash nafaqasi va MBA dasturi uchun mablag‘ to‘langanini tasdiqlagan. Tashkilot ushbu to‘lovlar o‘sha paytda amalda bo‘lgan ichki qoidalarga muvofiq amalga oshirilganini bildirgan.
FIFA esa Infantino nomidan uning sobiq xodim bilan noo‘rin munosabatda bo‘lgani yoki boshqa qonunbuzarliklarga yo‘l qo‘ygani haqidagi da’volarni rad etgan.
The Telegraph manbalariga ko‘ra, ehtimoliy tergov Infantinoning UEFAda 2000–2016-yillar davomida olib borgan faoliyatini qamrab olishi mumkin. Xususan, sobiq xodimga to‘lovlar hamda ehtimoliy shaxsiy munosabatlar kadrlar bo‘yicha qarorlarga ta’sir ko‘rsatgan-ko‘rsatmaganiga aniqlik kiritilishi kutilmoqda.
Infantino 2009–2016-yillarda UEFA bosh kotibi lavozimida ishlagan. 2016-yilda FIFA prezidenti etib saylangan va keyinchalik ikki marta raqibsiz qayta saylangan.
