Xivadagi "Qovun sayli" festivali Ginnes rekordlari kitobiga kiritildi
Festival doirasida "Eng katta qovun degustatsiyasi" yoʻnalishida rekord qayd etildi.
Xivadagi “Qovun sayli” festivalida jahon rekordi o‘rnatildi.
7–9 avgust kunlari Xiva shahridagi “Ichan qal’a” va “Arda Xiva” majmualarida “Qovun sayli” festivali bo‘lib o‘tdi.
Turizm qo‘mitasi va Xorazm viloyati hokimligi hamkorligida tashkil etilgan festivalga jami 186 ming nafar mehmon tashrif buyurgan. Ularning 150 ming nafari mahalliy, 36 ming nafari xorijiy sayyohlar bo‘lgan.
Festival doirasida “Eng katta qovun degustatsiyasi” yo‘nalishida jahon rekordi qayd etildi. Guinness World Records sertifikatiga ko‘ra, 9 avgust kuni 259 kishi bir vaqtning o‘zida 10 dan ortiq qovun navini tatib ko‘rgan.
Rekordni tasdiqlash jarayonida Guinness World Records hakami, tashkilotning Turkiya va Markaziy Osiyo bo‘yicha vakili Sheyda Subashi Gemiji ishtirok etgan.
Festival davomida qovun navlari, qishloq xo‘jaligi mahsulotlari va mahalliy ishlab chiqaruvchilarning ishlanmalari namoyish etildi. Shuningdek, mahorat darslari, ko‘rgazmalar va turli tanlovlar tashkil qilindi.
Tadbirning yakuniy qismida tanlov g‘oliblari ham aniqlandi. Uchinchi o‘rin Urganch davlat universiteti, “UzAuto” Xorazm filiali va Avtomobil yo‘llari qo‘mitasi Xorazm viloyati boshqarmasiga berildi. Ikkinchi o‘rinni Xorazm viloyati Qishloq xo‘jaligi boshqarmasi egallagan. Birinchi o‘rin Yangiariq tumani hokimligiga, bosh sovrin esa Xiva shahar hokimligiga nasib etgan.
Festivalning yopilish marosimida rossiyalik xonanda MakSim ham ishtirok etgan.
