SSSRni tiklash g‘oyasini targ‘ib qilgan fuqaro 4 yilga qamaldi
Aziz Hakimov tuhmat, haqorat qilish va milliy, irqiy, etnik yoki diniy adovat qo‘zg‘atishda aybdor deb topildi.
Jinoyat ishlari bo‘yicha Shayxontohur tuman sudida bloger Aziz Hakimovga nisbatan jinoyat ishi bo‘yicha hukm o‘qildi. Bu haqda Toshkent shahar sudlari xabar berdi.
Sudning yopiq majlisida Hakimov Jinoyat kodeksining 139-moddasi 2-qismi (tuhmat), 140-moddasi 2-qismi (haqorat qilish) va 156-moddasi 2-qismida (milliy, irqiy, etnik yoki diniy adovat qo‘zg‘atish) nazarda tutilgan jinoyatlarni sodir etganlikda aybdor, deb topildi.
Unga jazolarni qisman qo‘shish yo‘li bilan 4-yil 2 oy muddatga ozodlikdan mahrum qilish jazosi tayinlandi. Jazoni o‘tash muddati 2025-yil 26-sentyabrdan hisoblanishi belgilandi.
Shu bilan birga, sud Hakimovning harakatlarida Jinoyat kodeksining 150-moddasida nazarda tutilgan urushni targ‘ib qilish jinoyati tarkibi mavjud emas, degan xulosaga keldi. Shu asosda mazkur ayblov bo‘yicha u oqlandi.
Sud hukmiga ko‘ra, Raqamli texnologiyalar vazirligiga Hakimov yuritgan Telegram’dagi «Comrade_Aziz» kanalini bloklash majburiyati ham yuklatildi.
Ish bo‘yicha 6 nafar jabrlanuvchiga yetkazilgan moddiy va ma’naviy zararni undirish masalasida fuqarolik ishlari bo‘yicha sudga murojaat qilish huquqi tushuntirildi.
Shuningdek, sudlanuvchiga hukm ustidan yuqori sud instansiyasiga shikoyat berish tartibi va muddati tushuntirilgan.
