Jizzaxda Onix va Volkswagen to‘qnashuvida ikki haydovchi halok bo‘ldi
Dastlabki ma’lumotlarga ko‘ra, Onix haydovchisi uxlab qolib, qarama-qarshi yo‘nalishga chiqib ketgan.
Jizzax viloyatining Zomin tumanida ikki avtomobil ishtirokida og‘ir yo‘l-transport hodisasi sodir bo‘ldi. To‘qnashuv oqibatida ikki nafar haydovchi halok bo‘lgan.
Kun.uz ma’lum qilishicha, YTH 11-avgust kuni soat 10:05 lar atrofida Zomin tumani Alisher Navoiy mahallasi hududidan o‘tuvchi “Jizzax–Ravot–Zomin–Savot” avtomobil yo‘lida yuz bergan.
Dastlabki ma’lumotlarga ko‘ra, 1998-yilda tug‘ilgan F. E. boshqaruvidagi Onix avtomobili harakatlanib ketayotib, qarama-qarshi yo‘nalishdan kelayotgan Volkswagen avtomobili bilan to‘qnashgan.
Volkswagen avtomobilini Toshkent shahrida yashovchi 28 yoshli A. R. boshqargan.
To‘qnashuv natijasida har ikki avtomobil haydovchisi og‘ir tan jarohatlari olgan va voqea joyida vafot etgan.
Dastlabki ma’lumotlarga ko‘ra, Onix haydovchisi avtomobilni boshqarish vaqtida uxlab qolgan va shu sababli qarama-qarshi harakatlanish qismiga chiqib ketgan.
