Ozodbek Nazarbekovga parlament so‘rovi yuborildi
So‘rov san’at maktablarida binolarning ta’mirtalabligi, jihozlar va pedagog kadrlar yetishmasligi kabi muammolar saqlanib qolayotgani sabab yuborildi.
Oliy Majlis Qonunchilik palatasi majlisida san’at ta’limi muassasalaridagi mavjud muammolar muhokama qilinib, madaniyat vaziri Ozodbek Nazarbekovga parlament so‘rovi yuborildi.
Deputatlar hududlarda o‘tkazgan o‘rganishlar va ta’lim muassasalaridan olingan ma’lumotlar sohada qator tizimli muammolar saqlanib qolayotganini ko‘rsatganini ta’kidladi.
Ma’lum qilinishicha, respublikada 326 ta bolalar musiqa va san’at maktabi barpo etilgan. Qator ta’lim muassasalari rekonstruksiya qilinib, musiqa cholg‘ulari va o‘quv jihozlari bilan ta’minlangan. Biroq ayrim muassasalarning binolari kapital ta’mirga muhtoj.
Jumladan, Termiz, Farg‘ona, Urganch, Samarqand va Navoiy shaharlaridagi ixtisoslashtirilgan san’at maktablari, Andijon shahridagi Sherali Jo‘rayev nomidagi musiqa va san’at oliy maktabi hamda Toshkent shahridagi R.Glier nomidagi respublika ixtisoslashtirilgan san’at maktabi binolarida kapital ta’mirga ehtiyoj borligi aniqlangan.
Shuningdek, 2020-yildagi prezident qarorida belgilangan Buxoro, Qarshi, Namangan va Urganch shaharlarida ixtisoslashtirilgan boshlang‘ich raqs san’ati maktab-internatlarini tashkil etish vazifasi ham to‘liq bajarilmagan.
Buxoro ixtisoslashtirilgan san’at maktabi uchun bir gektar yer maydoni ajratilgan va 43 mlrd so‘mlik loyiha-smeta hujjatlari tayyorlangan. Biroq mablag‘ ajratilmagani sababli qurilish ishlari boshlanmagan.
Ayrim musiqa va san’at ta’limi muassasalarida o‘quvchilar soni binolarning loyiha quvvatidan yuqori ekani, mashg‘ulot xonalarining akustik holati talabga javob bermasligi, maxsus sinf xonalari va konsert zallari yetishmasligi qayd etilgan.
Kadrlar masalasida ham muammolar bor. Xususan, ayrim muassasalarda konsertmeysterlar hamda tor ixtisosliklar bo‘yicha pedagoglar yetishmaydi.
Shu munosabat bilan deputatlar madaniyat vaziridan san’at ta’limi muassasalarini zarur jihozlar va o‘quv-uslubiy vositalar bilan ta’minlash, ta’lim sifati va kadrlar salohiyatini oshirish, pedagoglar malakasini oshirish va attestatsiyadan o‘tkazish tizimini takomillashtirish, shuningdek, maktab-internatlarni tarbiyachilar bilan ta’minlash bo‘yicha amalga oshirilayotgan ishlar yuzasidan asoslantirilgan tushuntirish berishni so‘radi.
