Toshkentda Telegramdagi narkodo‘konning ikki “omborchisi” ushlandi
Ularning yashash manzillaridan 2 kilogramm gashish yog‘i, marixuana va gashish aniqlandi.
Joriy yilning 3-avgust kuni IIV Tezkor-qidiruv departamenti va uning hududiy bo‘linmalari hamkorligida Toshkent shahrining Yakkasaroy va Chilonzor tumanlarida tezkor tadbirlar o‘tkazildi. Tadbirlar davomida 1993-yilda tug‘ilgan shaxs hamda 1992-yilda tug‘ilgan, avval sudlangan uning jinoiy sherigi giyohvandlik vositalarini “zakladka” usulida tarqatayotgan vaqtida ushlangan.
Ularning “Nexia-3” rusumli avtomobili ko‘zdan kechirilganda, 20 gramm gashish yog‘i aniqlanib, daliliy ashyo sifatida rasmiylashtirib olingan.
Tergovga oid dastlabki ma’lumotlarga ko‘ra, ular 2025-yildan buyon Telegram platformasidagi narkodo‘konda omborchi sifatida faoliyat yuritib, oyiga qariyb 10 kilogrammgacha turli xil giyohvandlik vositalarini tarqatib kelgan.
Tezkor tadbir davomida gumonlanuvchilarning yashash manzillari ham ko‘zdan kechirildi. Natijada u yerdan 2 kilogramm gashish yog‘i, marixuana va gashish, shuningdek, giyohvandlik vositalarini qadoqlash va tarqatishda foydalanilgan izolyatsion lentalar hamda boshqa ashyolar topilgan.
IIV ma’lumotiga ko‘ra, tadbirlar natijasida jami 2 kilogramm 170 gramm, ya’ni taxminan 10 700 dozaga teng giyohvandlik vositalari iste’moldan olib qo‘yilgan.
Mazkur holat yuzasidan ushbu shaxslarga nisbatan Jinoyat kodeksining 273-moddasi 6-qismi bilan jinoyat ishi qo‘zg‘atilgan. Hozirda holat yuzasidan tegishli tergov harakatlari olib borilmoqda.
