Tramp Erondan AQSh askarlari o‘limi uchun kompensatsiya talab qilmoqda
AQSh prezidenti bu masalani Tehron bilan kelgusidagi muzokaralarda ko‘tarishini aytdi.
AQSh prezidenti Donald Tramp Eron hukumatidan amerikalik harbiy xizmatchilarning o‘limi va jarohatlanishi bilan bog‘liq zararlar uchun kompensatsiya talab qilish niyatida ekanini ma’lum qildi. Bu haqda TASS xabar berdi.
Trampning aytishicha, Vashington Eron bilan kelgusidagi muzokaralarda amerikalik harbiylarning turli mojarolar, jumladan, yo‘l bo‘yidagi portlashlar oqibatida halok bo‘lgani va yaralangani masalasini ko‘taradi.
AQSh prezidenti, shuningdek, so‘nggi 50 yil davomida Erondagi norozilik namoyishlarida jabrlangan fuqarolar oilalariga ham Eron tomonidan kompensatsiya to‘lanishi kerak, degan pozitsiyani ilgari surgan.
Tramp bu masalalarni AQShning Eron bilan bo‘lajak muzokaralarida aniq bayon qilish bo‘yicha o‘z vakillariga topshiriq berganini aytgan.
AQSh prezidenti, shuningdek, avvalgi mojarolar davomida amerikalik harbiylarning o‘limida Eronning javobgarligi borligini ta’kidlab, kompensatsiya talablarini kengaytirish niyatida ekanini bildirgan.
