Tramp ma’muriyati 175 mingdan ortiq AQSH vizasini bekor qildi

AQSH Davlat departamenti Donald Tramp prezidentligining ikkinchi muddati davomida xorijiy fuqarolarga berilgan 175 mingdan ortiq vizani bekor qilganini ma’lum qildi. Departament bu qarorlar vizalardan foydalanish shartlariga rioya etilishini ta’minlashga qaratilgan doimiy tekshiruvlar natijasi ekanini bildirdi. Bu haqda Reuters xabar berdi.

Departament ma’lumotlariga ko‘ra, bekor qilingan vizalarning katta qismi huquqni muhofaza qiluvchi organlar bilan bog‘liq holatlar, jumladan, jinoyat sodir etish, shuningdek viza talablarini buzish va firibgarlik bilan bog‘liq. Hujjatda zo‘ravonlikka chaqiriqlar hamda milliy xavfsizlikka tahdid solishi mumkin bo‘lgan holatlar ham sabablar qatorida keltirilgan.

Vizalar bekor qilinishiga olib kelgan jinoyatlar orasida tajovuz, mast holda avtomobil boshqarish, o‘g‘rilik va giyohvand moddalar bilan bog‘liq huquqbuzarliklar ham qayd etilgan. Departament ayrim aniq holatlarni ham keltirgan, jumladan, og‘ir zo‘rlash va jinsiy tajovuzda ayblangan, odam o‘g‘irlash va odam savdosida gumon qilingan hamda bolalarga nisbatan jinsiy zo‘ravonlik materiallarini saqlashda ayblangan shaxslarning vizalari bekor qilingan.

Shuningdek, Shimoliy Afrikadagi AQSH elchixonalaridan biri 100 dan ortiq vizani AQSHga asosan farzandini u yerda dunyoga keltirish va unga AQSH fuqaroligini olish maqsadida borgan deb gumon qilingan ota-onalardan bekor qilgan.

Davlat departamenti ayrim vizalar xorijiy fuqarolarning Charli Kirkning o‘ldirilishini olqishlagani bilan bog‘liq bayonotlari sabab ham bekor qilinganini ma’lum qildi. Departament bunday shaxslarni aniqlash va tekshirish davom ettirilishini bildirdi.