Yangiyo‘lda kredit qarzi sabab uy xatlanib, auksionda sotildi
Turarjoy 250 mln so‘mga baholangan xolda elektron onlayn-auksion orqali sotuvga chiqarilib, 230 mln so‘mga sotilgan
Fuqarolik ishlari bo‘yicha Shayxontohur tumanlararo sudining ijro varaqasiga asosan qarzdor T.Sh.dan undiruvchi “Davrbank” XATB foydasiga jami 281 177 208 so‘m kredit qarzdorlikni undirish va undiruvni garov mulki hisoblangan T.Sh.ga tegishli Toshkent viloyati, Yangiyo‘l tumani, “Ko‘kalamzor” mahallasi Sh.Rashidov ko‘chasida joylashgan 5 qavatli binoning 4-qavatida joylashgan xonali uyning umumiy foydalanish maydoni 47.8 kv.metr, yashash maydoni 29.76 kv.metr bo‘lgan turar joy binoga qaratish to‘g‘risidagi ijro hujjati Byuroning Toshkent viloyat boshqarmasi ish yurituviga kelib tushgan va ijro harakatlariga kirishilgan.
Olib borilgan ijro harakatlari davomida, qarzdor tomonidan ijro hujjati talabi bajarilmaganligi sababli, kredit qarzdorligini undirish maqsadida ijro varaqasida ko‘rsatilgan qarzdor T.Sh.ga tegishli bo‘lgan garov mulki xatlanib, qarzdorlikni to‘lamagan taqdirda undiruv ushbu garov mulkiga qaratilishi to‘g‘risida ogohlantirilgan.
Shunga qaramasdan, qarzdor tomonidan kredit qarzdorlik to‘lanmaganligi sababli, Byuroning Toshkent viloyati boshqarmasi Alohida muhim ijro ishlarini ijro etish shoʻbasi inspektorining qaroriga asosan ushbu garov mulki garov shartnomasida ko‘rsatilgan 250.000.000 so‘mga baholangan xolda elektron onlayn-auksion orqali sotuvga chiqarilib, 230.000.000 so‘mga sotilgan va sotuvdan tushgan pul mablag‘i undiruvchi foydasiga o‘tkazib berilishi taʼminlangan.
