Bilim, hamjihatlik va 5 ming qadam: ekologiya qurultoyining ikkinchi kuni qanday o‘tdi?
Qashqadaryoda xalqaro ekologiya qurultoyi doirasidagi tadbirlar davom etmoqda.
Qashqadaryo viloyati Shahrisabz tumanidagi “Lochin” bolalar oromgohida “Yoshlar — kelajak bunyodkorlari” V xalqaro ekologiya qurultoyining ikkinchi kuni ham mazmunli va qiziqarli tadbirlarga boy o‘tdi.
Kun avvalida xorijiy hamda mahalliy ishtirokchilar uchun ekologiya yo‘nalishida o‘quv mashg‘ulotlari va seminarlar tashkil etildi. Unda yoshlar atrof-muhitni muhofaza qilish, ekologik muammolarning oldini olish hamda ularning zamonaviy yechimlari bo‘yicha turli ma’lumot va tavsiyalarga ega bo‘ldi. Mashg‘ulotlarda xorijiy ishtirokchilar bilan tajriba almashish uchun ham imkoniyat yaratildi.
Tushlikdan so‘ng esa qurultoy ishtirokchilari uchun o‘ziga xos ko‘rgazma tashkil etildi. Unda O‘zbekistonning turli hududlaridan tashrif buyurgan yoshlar o‘z viloyatlarining tabiiy, madaniy va ekologik jihatdan o‘ziga xos tomonlarini namoyish etdi. Har bir hudud o‘ziga xos yondashuv asosida ko‘rgazma tashkil etib, tashrif buyuruvchilarga viloyatining qadriyatlari va an’analarini tanishtirdi.
Ko‘rgazmadan so‘ng yoshlar ishtirokida 5 ming qadam yurish aksiyasi tashkil etildi. Ekologik targ‘ibot va sog‘lom turmush tarzini uyg‘unlashtirgan ushbu tashabbusda qurultoy ishtirokchilari birgalikda yurib, atrof-muhitga e’tibor va ekologik madaniyatni targ‘ib qildi.
Kun yakunida esa “Yoshlar — kelajak bunyodkorlari” V xalqaro ekologiya qurultoyining rasmiy ochilish marosimi bo‘lib o‘tdi. Tantanali tadbirda taniqli san’atkorlar va shou-biznes vakillari ishtirok etib, yoshlar uchun konsert dasturini namoyish etdi.
Shu tariqa, qurultoyning ikkinchi kuni ishtirokchilar uchun nafaqat yangi bilim va tajriba, balki turli hududlar bilan yaqindan tanishish, xalqaro do‘stlik va hamkorlikni mustahkamlash imkonini berdi.
