Iyul AQSh tarixidagi eng issiq oy bo‘ldi

Iyul oyi AQSh kontinental qismida 1895-yildan, ya’ni meteorologik kuzatuvlar muntazam qayd etila boshlanganidan buyon eng issiq oy sifatida qayd etildi. Bu haqda CBS News Milliy okean va atmosfera boshqarmasi (NOAA) ma’lumotlariga tayanib xabar berdi.

 

Ma’lumotlarga ko‘ra, iyul oyida mamlakat bo‘yicha o‘rtacha harorat 76,9°F (24,9°C) ni tashkil etgan. Bu 1936 va 2012-yillarda qayd etilgan avvalgi iyul rekordidan 0,1–0,2 darajaga yuqori.

 

Ayniqsa, Aydaho, Yuta, Vayoming va Montana shtatlarida yuqori haroratlar kuzatilib, ayrim hududlarda tarixiy rekordlar yangilangan.

 

Iyul oyida nafaqat kunduzgi, balki tungi harorat ham yuqori bo‘lgan. O‘rtacha tungi harorat 64,2°F (17,9°C) ga yetib, 2022-yilda qayd etilgan avvalgi rekorddan 0,7 darajaga yuqori ko‘rsatkichni tashkil qilgan.

 

Oy boshida boshlangan kuchli issiqlik to‘lqini 185 milliondan ortiq kishiga ta’sir ko‘rsatgan. Yuqori haroratlar sabab ko‘plab ommaviy tadbirlar bekor qilingan yoki boshqa muddatga qoldirilgan.

 

Shu bilan birga, mamlakat bo‘yicha o‘rtacha yog‘ingarchilik miqdori kuzatuvlar tarixidagi uchinchi eng past ko‘rsatkich bo‘lgan. Ayrim hududlarda esa haddan tashqari issiqlik kuchli yomg‘ir va suv toshqinlari bilan birga kuzatilgan. Texas Hill Country va Nyu-York shtatining sharqiy hududlari tabiiy ofatlardan ayniqsa jiddiy zarar ko‘rgan.

 

NOAA ma’lumotlariga ko‘ra, iyul oyida rekord darajadagi issiq, kuchli yog‘ingarchilik va vayronkor bo‘ronlar bir vaqtning o‘zida kuzatilgan. Mintaqaning katta qismini qamrab olgan “issiqlik gumbazi” esa yuqori harorat va namlikning xavfli uyg‘unligini yuzaga keltirgan.