Jiddiy kamchiliklarga yo‘l qo‘ygan 6 nafar IIB boshlig‘i lavozimidan ozod etiladi
Yana 7 nafar rahbarga intizomiy jazo qo‘llanadi.
Ichki ishlar vazirligida 11-avgust kuni mamlakatdagi kriminogen vaziyat, jinoyatlarning oldini olish va ularga qarshi kurashish samaradorligiga bag‘ishlangan navbatdagi hay’at yig‘ilishi o‘tkazildi.
Yig‘ilishda 2026-yilning birinchi yarmida ayrim hududlarda jinoyatchilikning oldini olish va kriminogen vaziyatni barqarorlashtirish borasida yo‘l qo‘yilgan kamchiliklar tanqidiy muhokama qilindi.
Hay’at qaroriga ko‘ra, jiddiy kamchiliklarga yo‘l qo‘ygan 6 nafar shahar va tuman IIB boshlig‘ini, jamoat xavfsizligini ta’minlash yo‘nalishidagi 2 nafar o‘rinbosarni hamda 2 nafar viloyat IIB mas’ul rahbarini lavozimidan ozod etish belgilandi.
Shuningdek, 7 nafar rahbarga nisbatan qat’iy intizomiy jazo chorasi qo‘llash, yana 3 nafar rahbarning lavozimida qolishi yoki qolmasligi masalasini ko‘rib chiqish bo‘yicha qaror qabul qilindi.
Shu bilan birga, jinoyatlarning oldini olish va ularni aniqlashda yuqori natijalarga erishgan hududlar ham qayd etildi. Reyting natijalariga ko‘ra, Toshkent viloyati birinchi, Samarqand viloyati ikkinchi, Farg‘ona viloyati uchinchi o‘rinni egalladi.
Bundan tashqari, Karmana, Jarqo‘rg‘on, Quva, Yunusobod, Namangan, Jondor, Piskent va Yangiobod tumanlari IIB rahbarlarini belgilangan tartibda rag‘batlantirish bo‘yicha takliflar kiritildi.
