Livan o‘lim jazosini bekor qildi
Shu tariqa mamlakat arab dunyosida o‘lim jazosini rasman bekor qilgan birinchi davlatga aylandi.
Livan parlamenti o‘lim jazosini bekor qilish to‘g‘risidagi qonun loyihasini ma’qulladi. Shu tariqa Livan arab davlatlari orasida o‘lim jazosini rasman bekor qilgan birinchi mamlakatga aylandi. Bu haqda ABC News xabar berdi.
Qonunga ko‘ra, o‘lim jazosi o‘rniga og‘ir mehnat bilan birga umrbod ozodlikdan mahrum qilish jazosi qo‘llanadi.
Ovoz berishda 128 deputatdan iborat parlament a’zolarining aksariyati qonun loyihasini qo‘llab-quvvatlagan. Hizbullohning parlamentdagi bloki esa hujjatga qarshi ovoz bergan.
Qonun loyihasi dastlab 2025-yil oktabr oyida parlamentga kiritilgan bo‘lib, turli siyosiy bloklardan yetti nafar deputat tomonidan qo‘llab-quvvatlangan. Hujjat parlament muhokamalari davomida o‘zgartirishlar kiritilgach, yakuniy shaklda ma’qullangan.
Livanda 2004-yildan buyon qatl etishga norasmiy moratoriy amal qilib kelgan. Biroq o‘lim jazosi qonunchilikda saqlanib qolgan va sudlar tomonidan bunday hukmlar chiqarilishi davom etgan.
Livanning Adliya vaziri Adel Nassar parlament qarorini mamlakat uchun “tarixiy qadam” deb baholagan.
Shu bilan birga, ayrim deputatlar o‘lim jazosi o‘rniga joriy etiladigan umrbod qamoq jazosining ayrim amaliy jihatlari hali aniqlashtirilishi lozimligini bildirgan.
O‘lim jazosini bekor qilish haqidagi ovoz berish parlamentda bahsli amnistiya qonuni muhokama qilinayotgan bir paytda o‘tkazilgan. Mazkur qonun ayrim mahkumlarning jazolarini yengillashtirish yoki ozod etish imkoniyatini nazarda tutadi.
