“Odam tashiyapsanmi? Pulini olyapsanmi?” —Surxondaryo hokimi transportdagi muammolarni tanqid qildi
Ulug‘bek Qosimov chiptalar savdosini shaffoflashtirish, poyezdlardagi sharoitlarni yaxshilash va yo‘lovchilarga xizmat ko‘rsatish sifatini oshirish bo‘yicha mas’ullarga bir hafta muddat berdi.
Surxondaryo viloyati hokimi Ulug‘bek Qosimov viloyat aholisiga transport xizmatlarini ko‘rsatishdagi muammolarni tanqid qilib, temir yo‘l, aviaqatnov va shaharlararo transport tizimidagi kamchiliklarni bartaraf etish bo‘yicha mas’ullarga topshiriqlar berdi.
Hokim, xususan, Surxondaryoni Toshkent bilan bog‘lovchi avtomobil yo‘llari, temir yo‘l qatnovlari va vagonlardagi sharoitlar bilan bog‘liq muammolarga e’tibor qaratdi.
Uning ta’kidlashicha, ayrim poyezdlarda sovutish tizimlari va boshqa zarur sharoitlar yetarli emas. Shuningdek, chiptalar taqchilligi hamda vokzallardagi xizmat ko‘rsatish sifati bo‘yicha aholining e’tirozlari mavjud.
“Vagonga mingan odam Toshkentga borguncha kasal bo‘lib qolyapti. Na sovutish tizimi ishlaydi, na sharoit bor. Na bilet bor, na vokzalda sharoit bor”, — dedi Ulug‘bek Qosimov.
Hokim aviaqatnovlar narxining oshgani va chiptalarni xarid qilishdagi qiyinchiliklarni ham tanqid qildi. U aviachiptalar narxini tahlil qilish, ularning sotilish jarayonini shaffoflashtirish va aholiga qulaylik yaratish zarurligini ta’kidladi.
Shuningdek, Sariosiyo yo‘nalishidagi shahar atrofi poyezdlari va Toshkentga qatnovchi poyezdlarni qisqa muddatda to‘liq ko‘rikdan o‘tkazish, yo‘lovchilar uchun zarur sharoitlarni yaratish va xizmatlar sifatini yaxshilash bo‘yicha topshiriq berildi.
Hokim vokzal va aeroportlarda yo‘lovchilarga xizmat ko‘rsatish sharoitlarini, jumladan, sanitariya holati, kutish zallari va boshqa infratuzilma obyektlarini ham tanqidiy o‘rganish lozimligini qayd etdi.
Shuningdek, chiptalar savdosida shaffoflikni ta’minlash, onlayn sotuvlarni takomillashtirish va tanish-bilishchilik holatlariga yo‘l qo‘ymaslik zarurligi ta’kidlandi.
Ulug‘bek Qosimov mas’ullarga bir hafta muddatda aniqlangan kamchiliklarni bartaraf etish bo‘yicha topshiriqlar berdi. U kelasi hafta vokzalga borib, Toshkent yo‘nalishidagi poyezdlar va Sariosiyo yo‘nalishidagi shahar atrofi poyezdlaridagi sharoitlarni shaxsan ko‘zdan kechirishini ma’lum qildi.
