“O‘zbekiston qo‘lyozma merosida tarixiy shaxslar” kitob-albomining yangi nashri chop etilmoqda
Nashrga XIII–XVIII asrlarga oid 185 ta noyob miniatyura va 20 dan ortiq yangi tarixiy shaxs tasvirlari kiritildi.
O‘zbekistonning boy qo‘lyozma merosini asrash, o‘rganish va xalqaro jamoatchilikka keng targ‘ib etishga qaratilgan navbatdagi yirik ilmiy-madaniy loyiha amalga oshirilmoqda.
Ayni paytda “O‘zbekiston qo‘lyozma merosida tarixiy shaxslar” kitob-albomining yangilangan va to‘ldirilgan nashrini chop etish ishlari Istanbul shahridagi “Mega Basım” nashriyotida boshlandi. Nashr O‘zbekistondagi Islom sivilizatsiyasi markazi direktori Firdavs Abduxoliqov ishtirokida tayyorlanmoqda.
Besh yillik ilmiy izlanishlar natijasida yaratilgan kitob-albom XIII–XVIII asrlarga oid noyob Sharq miniatyuralarini jamlagan. Unda Amir Temur, Mirzo Ulug‘bek, Alisher Navoiy, Zahiriddin Muhammad Bobur, Husayn Boyqaro, Ibn Sino kabi buyuk ajdodlarimiz, shuningdek, boshqa tarixiy shaxslarning qo‘lyozmalarda aks etgan qiyofalari o‘rin olgan.
Loyiha doirasida 45 dan ortiq mamlakatdagi 200 dan ziyod muzey, kutubxona va ilmiy-tadqiqot muassasalari bilan hamkorlik o‘rnatilib, 50 dan ortiq ilmiy safar amalga oshirilgan. Natijada XIII–XVIII asrlarga oid 185 ta miniatyura aniqlanib, ilmiy jihatdan o‘rganilgan.
Tadqiqotlar davomida Vashingtondagi Frir galereyasi, Nyu-Yorkdagi Metropoliten muzeyi, Britaniya kutubxonasi, Fransiya Milliy kutubxonasi, Kembrij universiteti kutubxonasi, To‘pqopi saroyi kutubxonasi kabi nufuzli muassasalarda saqlanayotgan manbalar ham o‘rganildi.
Yangi nashr avvalgi kitob-albom asosida qayta ko‘rib chiqilib, ekspertlarning takliflari hamda yangi ilmiy ma’lumotlar bilan boyitildi. Shuningdek, xorijiy muzey va kutubxonalarda saqlanayotgan 20 dan ortiq yangi tarixiy shaxslar tasviri nashrga kiritildi.
Kitob-albom o‘zbek, rus va ingliz tillarida tayyorlanmoqda. Nashr O‘zbekistonning qo‘lyozma merosi va Sharq miniatyura san’atining noyob namunalarini xalqaro ilmiy va madaniy jamoatchilikka kengroq taqdim etishga xizmat qiladi.
