Sharbat qutisiga yashirilgan 3,15 kg narkotik moddalar topildi
Giyohvandlik vositalari 20 ta o‘ramda bolalar sharbat qutisi ichiga yashirilgan.
“Toshkent-AERO” ixtisoslashtirilgan bojxona kompleksi xodimlari tomonidan giyohvandlik vositalarining noqonuniy aylanishiga qarshi navbatdagi tezkor-qidiruv tadbiri o‘tkazildi. Bu haqda Bojxona qo'mitasi matbuot xizmati xabar berdi.
3-avgust kuni Toshkent shahrida o‘tkazilgan tadbir davomida kuzatuvga olingan fuqaro boshqaruvidagi avtomobil to‘xtatilib, xolislar ishtirokida ko‘zdan kechirilgan. Tekshiruv vaqtida avtomobil salonidagi bolalar sharbat qutisi ichidan 20 o‘ramda, umumiy og‘irligi qariyb 11 gramm bo‘lgan giyohvandlik vositalari aniqlangan.
Holat bo‘yicha tezkor tadbir davom ettirilib, bojxona organlari tomonidan Davlat xavfsizlik xizmati va ichki ishlar organlari vakillari bilan hamkorlikda fuqaroning yashash xonadoni ham xolislar ishtirokida ko‘zdan kechirilgan.
Natijada xonadonda geroin, mefedron, marixuana va boshqa turdagi an’anaviy hamda sintetik giyohvandlik vositalari borligi aniqlangan. Ularning umumiy og‘irligi 3 kilogramm 150 grammni tashkil etgan.
Tezkor-qidiruv tadbirlarining keyingi bosqichida mazkur giyohvandlik vositalarining asl egasi bo‘lgan O‘zbekiston fuqarosi ham qo‘lga olingan.
Mazkur holat yuzasidan bojxona organlari tomonidan jinoyat ishi qo‘zg‘atilgan. Hozirda tergovga qadar va tergov harakatlari davom ettirilmoqda.
