Toshkent aeroportida yo'lovchilar bagajidan vino shishalariga yashirilgan qariyb 7 kg mefedron aniqlandi
Yo‘lovchilar Bangkokdan kelayotgan bo‘lgan.
Toshkent xalqaro aeroportida Bangkokdan uchib kelgan ikki yo‘lovchining bagajidan 6,8 kg mefedron sintetik giyohvandlik moddasi aniqlandi. Bu haqda Bojxona qo‘mitasi xabar berdi.
4-avgust kuni “Toshkent-Aero” IBK Kontrabandaga qarshi kurashish sho‘basi hamda “Toshkent xalqaro aeroporti” chegara bojxona posti xodimlari tomonidan tezkor tadbir o‘tkazilgan.
Ma’lum qilinishicha, yo‘lovchilar bojxona nazoratidan “yashil” yo‘lak orqali o‘tgan. Ularning bagajlari tekshirilganda bir-biriga o‘xshash ikki shishada vino hamda ikkita plastik quti aniqlangan. Ularda jami 6,8 kg og‘irlikdagi “Mefedron” sintetik giyohvandlik moddasi yashirilgani ma’lum bo‘lgan.
Mazkur holat yuzasidan bojxona organlari tomonidan jinoyat ishi qo‘zg‘atilgan.
Bojxona ma’lumotlariga ko‘ra, 2026-yil boshidan buyon huquqni muhofaza qiluvchi boshqa idoralar bilan hamkorlikda aniqlangan 471 ta holatda jami qariyb 1 tonna 800 kg giyohvandlik vositalarining noqonuniy olib o‘tilishi va mamlakat ichidagi yashirin aylanishiga chek qo‘yilgan.
