Andijonda qizlarni Turkiyaga fohishalikka olib ketishga uringan ayollar ushlandi
Ular qizlarni yuqori maoshli ish taklifi bilan aldab, Turkiyaga olib ketmoqchi bo‘lgan.
Andijon viloyatida ikki nafar ayol xorijda yuqori maoshli ish va’dasi bilan ikki qizni aldab, ularni Turkiyaga fohishalik bilan shug‘ullanishga olib ketishga uringani fosh etildi. Bu haqda Ichki ishlar vazirligi xabar berdi.
Ma’lum qilinishicha, Andijon viloyati IIB Tezkor-qidiruv xizmati xodimlari tomonidan o‘tkazilgan tezkor tadbir davomida 1998 va 1995-yillarda tug‘ilgan ikki nafar ayol 2002 va 1994-yillarda tug‘ilgan ikki qizni aldov yo‘li bilan o‘zlariga jalb qilgani aniqlangan.
Gumondorlar qizlarni yo‘l haqi va boshqa moddiy xarajatlarni keyinchalik ishlab berish sharti bilan Turkiyaga olib borib, ularni fohishalik bilan shug‘ullantirishni rejalashtirgan.
Qayd etilishicha, ular Tashkent xalqaro aeroporti orqali Turkiyaga chiqib ketishni rejalashtirgan. Biroq tezkor tadbir natijasida ikki nafar ayol Andijon viloyatining Shahrixon tumani hududida qoʻlga olingan.
Mazkur holat yuzasidan Jinoyat kodeksining 135-moddasi 2-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
