AQSh va Eron o‘rtasidagi 60 kunlik sulh uzaytiriladi
yakuniy muddat hozircha aniqlashtirilmoqda.
AQSh va Eron tomonlari Pokiston vositachiligida tuzilgan kelishuv doirasida amaldagi sulh muddatini uzaytirishga kelishib oldi. Bu haqda Turkiyaning Anadolu agentligi Pokiston hukumati manbalariga tayanib xabar berdi.
Manbalarga ko‘ra, har ikki tomon sulhni uzaytirishga vositachilar orqali rozilik bildirgan. Ayni paytda kelishuvning yangi muddati bo‘yicha tomonlar o‘rtasida xabar almashinuvi davom etmoqda.
Avvalroq AQSh va Eron o‘rtasida harbiy harakatlarni to‘xtatish hamda nizoni diplomatik yo‘l bilan hal etish maqsadida 60 kunlik vaqtinchalik sulh bo‘yicha o‘zaro anglashuv memorandumi imzolangan edi. Mazkur kelishuvning amal qilish muddati 17-avgust kuni yakunlanishi ko‘zda tutilgan.
Biroq sulh davrida ham tomonlar bir-birini kelishuv shartlarini buzishda ayblab kelgan. AQSh Eronni Hormuz bo‘g‘ozidagi vaziyatni keskinlashtirishda ayblagan bo‘lsa, Tehron Vashingtonni harbiy harakatlarni davom ettirishda ayblagan.
Ayni paytda sulhni uzaytirish bo‘yicha yakuniy muddat va kelishuvning keyingi shartlari aniqlashtirilmoqda.
