“Bu allaqachon zombi davlat” — Pentagon sobiq maslahatchisi
Duglas Makgregor Ukraina Rossiya zarbalari va havo mudofaasidagi muammolar sabab “xarobalar uyumiga” aylanishi mumkinligini aytdi.
Pentagonning sobiq maslahatchisi Duglas Makgregor Ukraina Rossiyaning harbiy zarbalari va havo mudofaasidagi muammolar sabab tobora zaiflashib, davlat sifatida jiddiy xavf ostida qolayotganini aytdi. Bu haqda u YouTube’dagi Deep Dive kanaliga bergan intervyusida ma’lum qilgan.
Makgregorning ta’kidlashicha, Ukraina asta-sekin boshqarib bo‘lmaydigan holatga kelmoqda. U mamlakatni “zombi davlat”ga qiyoslab, mavjud vaziyat davom etsa, Ukraina “xarobalar uyumiga” aylanishi va oxir-oqibat “o‘lik davlat”ga aylanishi mumkinligini bildirgan.
Sobiq Pentagon maslahatchisi, shuningdek, Ukrainada korrupsiya yuqori darajada ekanini ta’kidlab, ayrim Yevropa davlatlari Kiyevni qo‘llab-quvvatlash borasidagi pozitsiyasini o‘zgartirayotganini aytgan.
Makgregor Polshaning Ukrainani qo‘llab-quvvatlash masalasidagi siyosatiga ham to‘xtalib, Rossiya hozir vaziyatda tashabbusni qo‘lida ushlab turganini va Moskva zarur deb hisoblagan vaqtda qat’iy choralar ko‘rishi mumkinligini bildirgan.
