"Madaniyatchilar nima qilsa hamma ergashadi-ku, daraxt ekishni moda qilishsin" — Rasul Kusherboyev
Rasul Kusherboyev daraxt ekishni tug‘ilgan kun va farzandli bo‘lish kabi muhim sanalar bilan bog‘lab, uni yaxshi an’anaga aylantirishni taklif qildi.
Qashqadaryo viloyati Shahrisabz tumanidagi “Lochin” bolalar oromgohida o‘tkazilayotgan “Yoshlar — kelajak bunyodkorlari” V xalqaro ekologiya qurultoyi doirasida daraxt ekish va yashil hududlarni ko‘paytirish masalalariga e’tibor qaratildi.
Qurultoyda so‘zga chiqqan ekologiya va atrof-muhit masalalari bo‘yicha mutaxassis Rasul Kusherboyev daraxt ekishni nafaqat ekologik tashabbus, balki jamiyatda an’anaga aylantirish zarurligini ta’kidladi. Bu haqda Zamon.uz muxbiri xabar berdi.
U o‘z tajribasidan misol keltirib, har bir tug‘ilgan kunni daraxt ekish bilan bog‘lash mumkinligini aytdi. Kusherboyevning ta’kidlashicha, inson yoshi ulg‘aygani sari o‘zi ekkan daraxtlar sonini ham ko‘paytirib borishi, ularni parvarish qilishga mas’uliyat bilan yondashishi mumkin.
Shuningdek, u farzand tug‘ilishi, tug‘ilgan kun yoki boshqa muhim sanalarni nishonlash jarayonida daraxt ekishni odatga aylantirishni taklif qildi.
“Bir inson tug‘ilganda unga atab bitta daraxt ekib, uning yoniga ‘shuning tug‘ilganligi sharafiga ekilgan’ degan yozuv qo‘yilsa. Uzoq umr ko‘radigan daraxt ekilsa, bola 10–20 yoshga yetganda u katta daraxtga aylangan bo‘ladi. Har kimning o‘z daraxti bo‘ladi”, — dedi Rasul Kusherboyev.
Uning fikricha, bunday ekologik tashabbuslarni ommalashtirishda madaniyat vakillarining o‘rni alohida. Chunki jamiyatda yangi odat va an’analarning shakllanishida san’atkorlar va boshqa jamoatchilikka ta’siri yuqori bo‘lgan shaxslar muhim rol o'ynaydi.
Rasul Kusherboyev madaniyat vakillari daraxt ekishni o‘zlari namuna sifatida boshlab, uni keng targ‘ib qilsa, bu tashabbusni jamiyatda moda va yaxshi an’anaga aylantirish mumkinligini ta'kidladi.
