Italiyada o‘q-dori zavodida kuchli portlash sodir bo‘ldi

13-avgust kuni Rim shahrining janubi-sharqida joylashgan Kolleferro shahridagi o‘q-dori zavodida kuchli portlash yuz berdi. Portlashdan oldin korxona hududida yong‘in chiqqan va voqea joyiga o‘t o‘chiruvchilar hamda politsiya xodimlari yetib borgan. Ular yong‘inni bartaraf etish ishlarini olib borayotgan paytda kuchli portlash sodir bo‘lgan.

 

Voqea KNDS Ammo Italy kompaniyasiga qarashli, avval “Simmel Difesa” nomi bilan faoliyat yuritgan zavod hududida qayd etilgan. Korxona o‘rta va katta kalibrli o‘q-dorilar, shuningdek aerokosmik tizimlar uchun qattiq yonilg‘i ishlab chiqaradi.

 

Dastlabki ma’lumotlarga ko‘ra, portlash zavodning “poroxlarni presslash” bo‘limida yuz bergan bo‘lishi mumkin. Italiya ommaviy axborot vositalari portlashdan keyin osmonga katta qora tutun ko‘tarilganini xabar qilgan. Kuchli portlash ovozi Kolleferro atrofidagi hududlarda ham eshitilgan.

 

Voqea vaqtida zavod hududida yong‘inni o‘chirish uchun bir nechta yong‘in-qutqaruv ekipajlari va politsiya kuchlari ishlagan. AP ma’lumotiga ko‘ra, yong‘in yaqin atrofga ham tarqalgan va hududni nazorat qilish uchun vertolyot jalb qilingan.

 

Kolleferro meri Julio Kalamitaning bildirishicha, vaziyat nazorat ostiga olingan. Uning ta’kidlashicha, portlash zavod yopiq bo‘lgan yozgi ta’til davrida sodir bo‘lgan. Merning so‘zlariga ko‘ra, korxona odatdagidek ishlayotganida bu voqea ancha og‘ir oqibatlarga olib kelishi mumkin edi.

 

Dastlabki ma’lumotlarga ko‘ra, portlash oqibatida jabrlanganlar va halok bo‘lganlar haqida xabar berilmagan. Mahalliy manbalar zavodda bo‘lgan ishchilarning barchasi xavfsiz joyga chiqqanini ma’lum qilgan. AP ma’lumotiga ko‘ra, zavodda bo‘lgan 24 nafar ishchining barchasi hisobga olingan.

 

Hozircha portlashning aniq sababi ma’lum emas. Huquqni muhofaza qiluvchi organlar va prokuratura voqea sabablarini aniqlash bo‘yicha tekshiruv boshlagan.