Navoiyda 340 mln so‘mlik oltin savdosiga chek qo‘yildi
212,9 gramm oltinni sotmoqchi bo‘lgan shaxslar xaridordan 20 ming AQSH dollari va 100 mln so‘m olayotganida qo‘lga olindi.
Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari hamkorligida Navoiy shahrida tezkor tadbir davomida Buxoro viloyatining Shofirkon tumanida yashovchi, 1987 va 1993-yillarda tug‘ilgan ikki nafar fuqaro tomonidan noqonuniy oltin savdosi amalga oshirilayotgani aniqlandi. Bu haqda DXX xabar berdi.
Ma’lum bo‘lishicha, shaxslar umumiy 212,9 gramm quyma oltinni xaridorga 340 million so‘mga sotishga kelishgan. Ular xaridorga 999 probali 26,3 gramm oltinni topshirib, qolgan qismini keyinchalik yetkazib berishni va’da qilgan.
Shuningdek, oltin uchun xaridordan 20 ming AQSH dollari va 100 million so‘mni olgan vaqtida ikki nafar shaxs ashyoviy dalillar bilan ushlangan.
Tezkor tadbir davomida ulardan birining yashash xonadonida qumdan oltinni ajratib olishga mo‘ljallangan yashirin sex tashkil etilgani ham aniqlangan.
Mazkur holat yuzasidan fuqarolarga nisbatan Jinoyat kodeksining 177-moddasi 4-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
