Qashqadaryoda 856 nafar talabaning kontrakti to'lab beriladi
Ushbu maqsad uchun jami 3,78 milliard so‘m mablag‘ ajratildi.
Qashqadaryo viloyatida ehtiyojmand oilalar farzandlarining oliy ta’lim olishini qo‘llab-quvvatlash maqsadida 856 nafar talabaning kontrakt to‘lovlarini qoplash uchun mablag‘ ajratildi. Bu haqda viloyat hokimligi matbuot xizmati xabar berdi.
Mazkur tashabbus yoshlarning sifatli ta’lim olishi uchun imkoniyatlarni kengaytirish, ijtimoiy himoyaga muhtoj oilalar farzandlarini qo‘llab-quvvatlash hamda ularning ta’lim olishdagi moliyaviy qiyinchiliklarini kamaytirishga qaratilgan.
Qayd etilishicha, Qashqadaryo viloyati hokimi Murotjon Azimov tomonidan ehtiyojmand oilalar farzandlarining oliy ta’lim olishini qo‘llab-quvvatlashga qaratilgan tegishli qaror qabul qilingan.
Unga ko‘ra, viloyatdagi 856 nafar talaba-yoshning kontrakt to‘lovlari uchun jami 3 milliard 780 million 600 ming so‘m ajratilgan.
Amaliy yordam, ayniqsa, oilaviy sharoiti sabab kontrakt to‘lovini amalga oshirishda qiyinchilikka duch kelayotgan yoshlarning o‘qishini davom ettirishiga ko‘maklashadi. Shuningdek, tashabbus xotin-qizlarning oliy ta’lim olish imkoniyatlarini kengaytirish va yoshlarning kelajakka bo‘lgan ishonchini mustahkamlashga xizmat qiladi.
