Qozog‘istonda 15 million fuqaroning ma’lumotlari darknetda sotilmoqda
Raqamli rivojlanish vazirligi ma’lumotlar sizib chiqishi holatini tekshirmoqda.
Qozog‘istonda 15 millionga yaqin fuqaroning shaxsiy ma’lumotlari darknetda sotuvga qo‘yilgani haqidagi xabarlar tarqaldi. Mamlakatning Sun’iy intellekt va raqamli rivojlanish vazirligi ushbu ma’lumotlar sizib chiqishi holatini tekshirayotganini ma’lum qildi.
Tarqalgan ma’lumotlarga ko‘ra, shymzz13 taxallusidagi darknet foydalanuvchisi 15 million kishiga oid ma’lumotlar bazasini 0,5 bitkoin, ya’ni taxminan 32 ming dollarga sotishni taklif qilgan. Sotuvchi bazada pasport ma’lumotlari, telefon raqamlari, elektron pochta manzillari, bandlikka oid ma’lumotlar, hujjatlar skanlari va parollar mavjudligini da’vo qilgan.
Aytilishicha, ma’lumotlar bazasi 2,7 gigabayt hajmda bo‘lib, unda 47 million qator ma’lumot mavjud.
Mazkur holat Qozog‘iston Ichki ishlar vazirligi hamda Kiberhujumlarni tahlil qilish va tekshirish markazi tomonidan o‘rganilmoqda. Raqamli rivojlanish vazirligi ham tegishli idoralar bilan hamkorlikda internetda tarqalgan ma’lumotlar namunalarini texnik jihatdan tekshirayotganini bildirgan.
Vazirlik hozircha eGov axborot tizimlariga xakerlik hujumi uyushtirilgani yoki ma’lumotlar bazasi bevosita eGov tizimidan olingani tasdiqlanmaganini ta’kidlagan. Shuningdek, tarqalgan ayrim ma’lumotlar eGov tizimida saqlanadigan ma’lumotlarning tuzilishi va formatiga mos kelmasligi qayd etilgan.
Xususan, eGov pasport skanlarini tarqalgan shaklda saqlamasligi va raqamli hujjatlarning boshqa formatda ekanligi ma’lum qilingan. Shu sababli darknetdagi sotuvchining ma’lumotlar bazasi eGov’dan o‘g‘irlangan degan da’vosi hozircha tizim buzilganining isboti sifatida baholanmayapti.
Texnik tekshiruv davom etmoqda. Uning yakunlari bo‘yicha qo‘shimcha ma’lumot berilishi kutilmoqda.
Eslatib o'tamiz, joriy yilning 2 fevral kuni ijtimoiy tarmoqlar va ayrim kanallarda go‘yoki 15 million O'zbekiston fuqarolariga tegishli maʼlumotlar sizib chiqqanligi haqida xabarlar tarqalgandi. Lekin ijtimoiy tarmoqlarda 15 million fuqarolar maʼlumotlari to‘g‘risida tarqalgan xabarlar dastlabki o‘rganish natijalariga ko‘ra 60 mingga yaqin ekanligi aniqlangani xabar qilingan edi.
