Rossiya Ukrainada 16 mingdan ortiq tinch aholini hibsda ushlab turibdi – BMT

 
Birlashgan Millatlar Tashkiloti ma’lumotlariga ko‘ra, Rossiya tomonidan urush davomida hibsga olingan 16 mingdan ortiq ukrainalik tinch aholi hanuzgacha ozodlikdan mahrum etilgan. BMT ularning ko‘pchiligi qarindoshlari bilan aloqaga chiqish yoki huquqiy himoyadan foydalanish imkoniyatidan mahrum qilinganini bildirdi.

 
BMTning inson huquqlari bo‘yicha vakillari Rossiya tomonidan hibsda saqlanayotgan ukrainalik fuqarolar va harbiy asirlar bilan bog‘liq holatlarni o‘rgangan. Ularning ma’lumotlariga ko‘ra, suhbatlashilgan ukrainalik harbiy asirlarning 95 foizdan ortig‘i, shuningdek, fuqarolik mahbuslarining 85 foizi qiynoqlar yoki boshqa turdagi shafqatsiz muomalaga duch kelganini bildirgan.

 
BMT, shuningdek, Ukraina harbiy asirlari orasida 129 kishining qatl etilgani va Rossiya hibsxonalari yoki qamoqxonalarida qiynoqlar hamda og‘ir sharoitlar oqibatida 48 kishi halok bo‘lgani haqida ma’lumot to‘plagan.

 
BMT Xavfsizlik kengashi yig‘ilishida Rossiya tomonidan hibsga olingan ukrainaliklarning ayrimlari o‘z boshidan kechirganlarini so‘zlab berdi. Ukrainalik harbiy asir Xuan Leyva Garsiya qariyb uch yarim yil davomida asirlikda bo‘lganini va kaltaklash hamda elektr toki bilan qiynoqqa solinganini aytdi. Qrim-tatar faoli Lenie Umerova esa otasini ko‘rish uchun Qrimga borishga uringanidan keyin hibsga olinganini ma’lum qildi.

 
Shu bilan birga, BMT Rossiya harbiy asirlari bilan bog‘liq holatlarni ham qayd etgan. Tashkilot bilan suhbatlashgan rossiyalik harbiy asirlarning qariyb yarmi asirga olingan dastlabki davrda Ukraina kuchlari tomonidan yomon muomalaga duch kelganini bildirgan. Biroq ular Ukraina qamoqxonalariga joylashtirilgach, muomala yaxshilangani qayd etilgan.

 
Rossiya esa BMTning ayblovlarini rad etib, ularni Ukraina va NATO davlatlarining propagandasi deb atagan.