Rossiyada migrantlar uchun daromad solig‘ini oshirish taklif qilindi
Shuningdek, soliq to‘lamagan xorijliklarni deportatsiya qilish taklifi ham ilgari surildi.
Rossiya Davlat Dumasi Xavfsizlik qo‘mitasi raisining birinchi o‘rinbosari Andrey Lugovoy xorijiy fuqarolar uchun daromad solig‘i stavkasini 30 foizgacha oshirishni taklif qildi. Bu haqda TASS xabar berdi.
Deputatning ta’kidlashicha, xorijiy ishchilar Rossiyaning infratuzilmasi va tibbiy xizmatlaridan foydalanadi. Shu sababli, uning fikricha, ular tomonidan to‘lanadigan soliqlar miqdorini oshirish masalasini ko‘rib chiqish lozim.
Lugovoy, shuningdek, soliq to‘lashdan bo‘yin tovlagan migrantlarni Rossiyadan deportatsiya qilish choralarini qo‘llab-quvvatladi. U bunday holatlarda soliq qarzlarini bo‘lib-bo‘lib to‘lash imkoniyatini bermaslikni taklif qilgan.
Deputat yana migrantlar yoki ularning ish beruvchilaridan avans hisobvarag‘iga mablag‘ kiritishni joriy etish tashabbusini ilgari surgan. Ushbu mablag‘lar deportatsiya, vaqtinchalik joylashtirish, sud xarajatlari va jarimalarni qoplash uchun ishlatilishi mumkin.
Lugovoyning ta’kidlashicha, Rossiyaning migratsiya siyosati, avvalo, mamlakat manfaatlarini hisobga olishi kerak.
